Denis Tenniń kóliginen urlanǵan ainalar kimderge ótkizilýi tiis ekeni anyqtalyp, olar politsiiaǵa ózderiniń jaýaptaryn bergen. Bul týraly Astanada ótken baspasóz máslihatynda málim boldy, dep habarlaidy QazAqparat.
QR Ishki ister ministriniń orynbasary Rashid Jaqypovtyń sózine qaraǵanda, qazirgi kezde Denis Tenniń ólimi boiynsha kúdiktiler ainany kimderge ótkizbekshi bolǵany anyqtalǵan jáne olardan jaýap alynǵan.
«Olarǵa qatysty tiisti sharalar júrgizilip jatyr», - dep naqtylady vitse-ministr.
Budan bólek ol kúdikke ilingen Nurlan Qiiasov pen Arman Qudaibergenovty ustaýdyń mán-jaiyn ashyp aitpady.
«Bizdiń jumysymyzdyń barlyq ádisterin ashyp aita almaimyn. Biraq ta bul ádister óz tiimdiligin kórsetti jáne aiyptylardy qysqa merzimde anyqtaýǵa múmkindik berdi», - dep qosty R. Jaqypov.
Eske sala ketsek, qazaqstandyq mánerlep syrǵanaýshy, Sochi Olimpiadasynyń qola júldegeri Denis Ten 19 shilde kúni Almatyda avtokólik urylarynyń qolynan qaza tapty. Sportshy turaqta turǵan kóliginiń ainasyn urlamaq bolǵan qaskóilerdiń ústinen túsken. Arada janjal shyǵyp, saldarynan kúdiktiler Denis Tenge pyshaq suǵyp alady.
Sportshy 3 litr qan joǵaltqan. Dárigerler 2,5 saǵat boiy onyń ómiri úshin kúreskenmen, ajaldan arashalap qala almady. Denis Ten 17:30-da aýrýhanada jan tapsyrdy.
Atalǵan faktige qatysty qylmystyq is qozǵaldy. QR prezidenti Nursultan Nazarbaev bas prokýror men ishki ister ministrine istiń jiti jáne obektivti tergelýin qamtamasyz etýdi tapsyrdy.
20 shilde kúni tańerteń mánerlep syrǵanaýshynyń ólimine kúdikti Nuraly Qiiasov ustaldy. Ol Jambyl oblysynyń týmasy, 24 jasta. Sol kúni keshke ekinshi kúdikti Qyzylorda oblysynyń týmasy Arman Qudaibergenov ustaldy.
Al búgin Denis Tenniń ólimine qatysty tyń derekter shyqty. Almaty IID aqparatynsha, oqiǵany kózben kórgen adamdar tabylǵan. Betpe-bet kezdesý barysynda Nuraly Qiiasov Denis Tenge pyshaq suqqanyn moiyndady. Buǵan deiin Arman Qudaibergenov pyshaq jaraqatyn salǵanyn aitqan edi. Eki kúdikti de buryn zańdy buzǵan.
