Astana men Almaty qalalarynyń saýda ortalyqtary Denis Tenniń qazasyna bailanysty kóńil kóterý sharalaryn ótkizbeitin boldy, dep habarlaidy Sputnik Qazaqstan.
"Qurmetti qonaqtar, MEGA saýda oiyn-saýyq ortalyǵynyń barlyq jelisinde juma, senbi jáne jeksenbige (20, 21, 22 shilde kúnderi) josparlanǵan kóńil kóterý sharalary bolmaitynyn habarlaimyz", — delingen saýda ortalyǵynyń áleýmettik jelidegi paraqshasynda.
Kóńil kóterý sharalary Almatydaǵy Esentai Mall saýda ortalyǵynda da ótpeidi.
"Biz Denis Tenniń jaqyndary men týysqandaryna, sondai-aq onyń álemdegi barlyq jankúierine kóńil aitamyz. Bárimizdiń de qabyrǵamyz qaiysyp otyr. Tragediiaǵa bailanysty Esentai Mall ákimshiligi Esentai Music Festival aiasynda 21 shildege josparlanǵan kontsertti ótkizbeitin boldy", — dep jazdy ortalyq.
Eske sala ketsek, tragediia 19 shildede kúndiz Almaty qalasynyń ortalyǵynda bolǵan. Denis Ten turaqta turǵan avtokóligine kele jatyp, kóliktiń ainasyn urlamaq bolǵan qaskóilerdi kóredi. Urylardyń sońynan qýyp, toqtatpaq bolǵanda, pyshaq jaraqatyn alǵan.
Kóp qan joǵaltqan sportshy aýrýhanaǵa túskennen keiin eki saǵattan soń kóz jumdy.
Politsiia sportshyny óltirdi degen kúdikpen 24 jastaǵy Nuraly Qiiasovty ustady. Ol kinásin moiyndady. Qazirgi ýaqytta ekinshi kúdikti – Qyzylorda oblysynyń 24 jastaǵy týmasy Arman Qudaibergenov izdestirilip jatyr.
