Qazaqstandyq belgili mánerlep syrǵanaýshy Denis Tendi óltirdi degen kúdikpen ustalǵandardyń birine qatysty keibir málimetter anyqtaldy, dep habarlaidy "Ult aqparat".
QR IIM-niń baspasóz qyzmeti kúdiktilerdiń biri ustalyp, ýaqytsha ustaý izoliatoryna qamalǵanyn málim etken bolatyn.
Kúdikti, 1994 jyly Jambyl oblysynda týǵan Nuraly Qiiasov óziniń jasaǵan qylmysyn moiyndady.
Anyqtalǵandai, Merki aýylynda týǵan 24 jastaǵy Nuraly Qiiasovty 2017 jyly quqyq qorǵaý organdary úsh ret jaýapqa tartqan.
Atap aitqanda, ótken jyldyń qańtarynda ol mas kúiinde avtokólik basqarǵany úshin ustalyp, sýdia Rahat Razaqovtyń tóraǵalyǵymen Merki soty ony úsh jylǵa júrgizýshi kýáliginen aiyrǵan: «Qiiasov Nuraly Dáýletbekuly 2017 jylǵy 14 qańtar kúni tańerteń saǵat 07:38-de Jambyl oblysynyń Merki aýylynda «Mazda 626» markaly mashinany mas kúiinde júrgizgen. 31 qańtarda Merki aýdandyq sotynyń qaýlysymen úsh jyl merzimge júrgizýshi quqyǵynan aiyrylǵan», - delingen QR Joǵarǵy sotynyń «Sot kabineti» saitynda. Bul rette, onyń sot otyrysyna qatyspaǵany jáne kelmeýiniń sebebin túsindirmegeni atap ótilgen.
Naýryz aiynda Merki aýdandyq sotynyń sýdiasy Abai Dáýrenbekovtiń tóraǵalyǵymen taǵy bir sot otyrysy ótti. Urlyqqa qatysty qylmystyq is boiynsha sot talqylaýlary bir ai boiy júrdi.
Sottalýshyǵa mashina akkýmýliatory men magnitofonyn qoldy etti degen eki urlyq deregi boiynsha aiyp taǵyldy: «2017 jylǵy 17 aqpan kúni túngi saǵat 02:30 shamasynda D. Qiiasov Merkide aýyldasy A. Bainazarovpen birge kóshede kele jatqan. «Aýdi-80» avtomashinasyn kórip, eshkim joqta avtomobildiń aldyńǵy terezesin syndyryp, 14 myń teńge turatyn DVD-pleerdi, 2 myń teńge turatyn magnitofondy alǵan. Sodan keiin avtomashinanyń kapotyn ashyp, 8 myń teńge turatyn akkýmýliatoryn urlaǵan. Jalpy materialdyq zalal 24 myń teńgeni qurady. Budan soń ol aýyldasymen birge oqiǵa ornynan izin sýytqan», - delingen is materialdarynda.
Biraq sotta taraptar keltirilgen ziiandy óteý týraly kelisimge kelip, jábirlenýshiler uryny keshirgendikten, sot ony bostandyǵynan aiyrmai, ákimshilik jazamen shektelgen.
2017 jyly Nuraly Qiiasov shaǵyn nesie uiymyna qaryzy boiynsha úshinshi ret sot talqylaýyna tartylǵan. Qiiasov 144 myń teńgeden astam soma bereshek bolǵan.
16 qazanda Merki aýdandyq sotynyń sýdiasy Erkin Kenbaev «KMF (KMF)» Shaǵyn nesie uiymy» JShS-niń N.D. Qiiasovqa qatysty nesiesiniń, memlekettik bajdyń, sot shyǵyndaryn tóleý týraly talap aryzyn qarap», «... osy talap aryz boiynsha azamattyq is qozǵaý týraly» sheshim shyǵarǵan. Al 2018 jyldyń 8 qańtarynda is arhivke jiberilgen.
Eske sala keteiik, mánerlep syrǵanaýshy Denis Ten 19 shilde kúni tús kezinde pyshaq jaraqatymen aýrýhanaǵa jetkizildi. Almaty IID málimetinshe, belgisiz adamdar sportshynyń mashinasynyń ainasyn urlamaq bolyp, sanyna pyshaq suǵyp alǵan. Zardap shegýshi 3 litr qan joǵaltty. Dárigerler onyń jaǵdaiyn óte aýyr dep baǵalaǵan. Artynsha, QR Densaýlyq saqtaý ministrliginiń baspasóz hatshysy Ernar Ákimqulov sportshynyń qaitys bolǵanyn málimdedi.
Denis Tendi óltirdi degen kúdikke ilingen ekinshi adam - 1994 jyly týǵan Qyzylorda oblysy, Qarmaqshy aýdany, Aqai aýylynyń týmasy Arman Qudaibergenovke izdeý jariialandy.
