Almatyda Denis Tenniń ólimi boiynsha sot otyrysy jalǵasýda. Búgin sotta sportshynyń anasy Oksana Ten túsinik berdi, dep habarlaidy QazAqparat tilshisi.
"Birinshi sekýndtan bastap men munyń jai ǵana avtourlyq ekenine sengen joqpyn. Oǵan materialdarmen tanysý barysynda da kózim jetti. Denis sarań adam emes edi. Ol óte qoly ashyq jan bolǵan. Qymbat zattarǵa qaramaityn da. Men zatymdy joǵaltqan kezde ol únemi meni jubatatyn. Denisti bir zatqa bola tóbelestirý múmkin emes, ol úshin sheginen shyǵa ashýlandyrý kerek shyǵar. Denis shetelde uzaq júrdi. Qazaqstanda ol sirek bolatyn. Sport bazalarynda, jattyǵýda júretin. Onyń Qazaqstanda júrgenin dostary, tanystary jaqsy biletin", - dedi Oksana Ten.
Onyń aitýynsha, sol kúni ony "T9 grýpp" JShS direktory A.M. restoranǵa shaqyrǵan.
"Sol restorannyń direktory H. Denispen 1-3-synyptarda birge oqyǵan edi. Denis onymen jaqsy aralaspaityn. 13:45-te H. ony túski asqa shaqyrǵan. 13.48-de Denis oǵan kelisedi. Al 18 shildede búgin kúdikti bolyp otyrǵan úsheýi Almatyda jinalady. Olar 18 shilde kúni keshki 21-de qalanyń ortasynan pəter jaldaǵan. Aqshalary joq olar qymbat aýdannan qalai páter jaldaǵan? Barlyq əreket 19-y kúni túski ekide bastalady. Túski 14:14-te olar Naýryzbai kóshesimen Gogolǵa burylǵan.
14:18-te Denis restorannan shyqty. 14:30-da qylmyskerler sol oqiǵa ornynda bolǵan. Osy ýaqytqa deiin Qudaibergenov qolǵabymen júrgizýshi jaqtyń ainasyn sheship alǵan. Denis mashinaǵa Qurmanǵazy kóshesimen kele jatady. Qulaǵynda qulaqqap, mýzyka tyńdap bara jatady. Denis mashinaǵa kelgende Qudaibergenovty kórgen. Sol sətte Qudaibergenov onyń qolyna ekinshi ainany ustatady. Qandai ury kólik iesine ózi urlaǵan zatyn ustatýshy edi? Sodan soń Deniske Qudaibergenov birdeńe aityp, Denis ashýlanyp ketken. Oǵan ne aitqanyn bilmeimin. Qudaibergenov sport alańyna qarai qasha jóneledi. Onyń artynan Qiiasov júgiredi. Denis sol jerde qansyrap qulaǵansha aiaǵynan tik turǵan. Ony bir kýəger kórgen. Ol biraq tóbelesten qoryqqanynan mashinadan shyqpaǵan» - deidi Oksana Ten.
Onyń aitýynsha, avtourylar áýel bastan aina urlaýdy maqsat tutpaǵan.
"Denistiń sýmkasynda ainadan da qymbat zattar boldy. Nege ony almaǵan? Olar ne úshin jasady muny? Aqsha úshin ekeni ras. Biz tapa-tal túste adam óltire salatyn el emespiz. Kúndiz pyshaq ustap, adam óltirý bola bermeidi. Men osy nusqaǵa kóp adamnyń sengenin qalamaimyn. Denis Qazaqstanyn tek qana jaqsy jaǵynan kórsetkisi keletin, elin maqtaityn, jaqsy kóretin, bərin qonaqqa shaqyratyn. Bizge kelgen qonaqtar «Qazaqstan qandai ədemi, tamaqtaryń qandai dəmdi» dep aityp ketetin. Ustalǵandarǵa aitarym, sizder Qazaqstan úshin úlken qylmys jasadyńyzdar", - dedi O.Ten.
Onyń aitýynsha, Denistiń ómirlik ustanymdary bireýge unamaǵan nemese onyń ómirindegi səttilik bireýge kedergi bolǵan.
Eske salsaq, Denis Tendi biyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denis Tenniń ólimine qatysty qylmystyq is qozǵalyp, kúdiktiler izdestirildi. Elbasy Denis Tenge qatysty qylmysty muqiiat tekserýdi tapsyrdy. Keiin QR IIM kúdiktilerdiń ustalǵanyn jariia etti.
Aita keteiik, keshe Denis Tenniń ólimi boiynsha basty sot talqylaýy bastaldy. Is boiynsha aiyptalǵan kúdiktiler kisi óltirgenin moiyndamady. Sot otyrysynda politsiia Arman Qudaibergenovtiń nege bostandyqta júrgenin túsindirdi. Sot otyrysy búgin de jalǵasýda, onda marqumnyń anasy Oksana Ten túsinik berýde.
