Almatyda Olimpiada júldegeri Denis Tenniń ólimine qatysty sot jalǵasyp jatyr, dep habarlaidy QazAqparat tilshisi.
Sot aldynda úsh adam jaýap berýde. Olar - QR QK 434-baby, QR QK 24-babynyń 3-bólimi, 188-babynyń 2-bóliminiń 1-tarmaǵy boiynsha aiyptalǵan Janar Tolybaeva, QR QK 188-babynyń 2-bóliminiń 1-tarmaǵy, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Arman Qudaibergenov, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Nuraly Qiiasov. Qylmystyq is 38 tomnan turady.
Sot májilisinen shyqqan soń sottalýshy Janar Tolybaevanyń qorǵaýshysy Amangeldi Sariev jýrnalisterge túsinikteme berdi.
Onyń aitýynsha, bul qylmys tapsyryspen jasaldy degen qisynǵa kelmeidi.
«Bul qylmysqa eshkimniń, úshinshi, tórtinshi adamdardyń qatysy baryna dálel joq. Munda adamdy óltirý quramy joq. Kórdińizder ǵoi, telefondary, aqshasy, aifony, kóliktiń ainasy bári qalǵan. Qaraqshylyq jasaǵysy kelse, sýmkany bosatyp alyp ketpei me?!», - dedi Janar Tolybaevanyń qorǵaýshysy Amangeldi Sariev.
Onyń aitýynsha, Janar Tolybaeva Tenniń ólgenin Qapshaǵaida qydyryp júrgende estigen.
Eske salsaq, Denis Tendi biyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denis Tenniń ólimine qatysty qylmystyq is qozǵalyp, kúdiktiler izdestirildi. Elbasy Denis Tenge qatysty qylmysty muqiiat tekserýdi tapsyrdy. Keiin QR IIM kúdiktilerdiń ustalǵanyn jariia etti. Al, qyrkúiek aiynyń sońynda Ishki ister ministri Qalmuhanbet Qasymov atalmysh qylmystyq istiń tergelýine qatysty málimet bergen bolatyn. 25 jeltoqsanda Almaty qylmystyq ister boiynsha aýdanaralyq mamandandyrylǵan sotta belgili sportshynyń ólimi boiynsha aldyn ala sot tyńdalymy ótken-tin.
