Qazaqstandyq mánerlep syrǵanaýshy Denis Tendi óltirdi degen kúdiktilerdi jaqtap, áleýmettik jelide post jariialaǵan jas muǵalim mektepten óz erkimen ketýge daiyn, dep habarlaidy "Ýralskaia nedelia".
Ótken juma kúni, 21 shildede 25 jastaǵy Sherhan Baizenov feisbýkte avtokólik urylarynyń qolynan qaza tapqan Denis Tenniń sýretin jariialap, onyń ólimine kúdiktilerdi jaqtap, jazba qaldyrǵan. Ári qarai ol qytailardy "óltirý kerek" dep jazǵan.
Baizenovtiń bul jazbasy áleýmettik jeli qoldanýshylarynyń nazarynan tys qalmady. Jurt Beles aýylynda isteitin muǵalimniń jazbasyn "fashistik" dep atap, ony osy úshin qylmystyq jaýapkershilikke tartý talabymen memlekettik organdarǵa júgine bastady.
IIM jeli qoldanýshylarynyń talabyna lezde nazar aýdardy. Senbi kúni Sherhan Baizenov jaýap alý úshin BQO ishki ister departamentine jetkizildi. QK 174-baby 1-tarmaǵy boiynsha qylmystyq is qozǵalyp, odan eshqaida shyqpaý týraly qolhat alyndy.
25 jastaǵy Sherhan Baizenov Beles aýylynyń mektebinde qazaq tilinde matematikadan sabaq beredi. Onyń aitýynsha, oqýshylardyń ata-analary da ony aiyptap, balalaryn onyń sabaǵyna jibermeimiz degen. Baizenov mektepten ketýge daiyn, bul týraly mektep direktory Azamat Maemerge de aitypty.
Eske sala ketsek, 19 shilde kúni Almatyda qazaqstandyq mánerlep syrǵanaýshy Denis Ten kólik urylarynyń qolynan qaza tapty. Sportshy avtoturaqta turǵan kóliginiń ainasyn urlamaq bolǵan qaskóilerdiń ústinen túsken. Arada janjal shyǵyp, sportshy pyshaq jaraqatyn alady. Úsh litr qan joǵaltqan Ten keshki bes jarym shamasynda aýrýhanada kóz jumdy.
