Dańqty sportshy Denis Tendi óltirdi dep aiyptalyp, keshe qolǵa túsken Arman Qudaibergenov 11 shilde kúni Astanada kóliktiń ainasyn urlap ustalǵan eken. Alaida, politsiia ony qamaýdyń ornyna bostandyqqa jiberip, taǵy bir aýyr qylmys jasaýyna múmkindik bergen. Bul týraly "Vremia" gazeti jazdy.
Basylymnyń redaktsiiasyna astanalyq turǵyn Sapar Shámshiev habarlasyp, osydan on kún buryn bolǵan oqiǵa jaiynda aityp berdi. Ol kezde kúdikti Qudaibergenov elordada júrgen jáne Shámshievtiń kóliginiń ainasyn urlap ustalypty. Alaida, tártip saqshylary ony qamaýdyń ornyna qolhatpen bosata salǵan.
- Oqiǵa bolǵan kúnniń ertesine men Almaty aýdandyq IIB-ne baryp, ainamdy alyp kettim. Maǵan politseiler 7-10 kúnnen keiin Qudaibergenovtiń ústinen sot bolatynyn eskertti. Onyń ózi qaida jáne kim dep suraǵanymda, buryn sottalǵan adam ekenin aitty. 13 shilde kúni politsiiadan taǵy habarlasyp, kúdikti Qudaibergenovke meniń telefon nomerimdi berýge ruqsat surady. Ne úshin desem, keshirim surap, bitimge kelgisi keletinin jetkizdi. Men bas tarttym, ony sottatý kerek dep sheshtim. Óitkeni, buryn da urlyqpen sottalǵan eken. Qamalsyn dedim. Búgingi kúnge deiin men ony qamaýda shyǵar dep oilaǵam... - deidi Sapar Shámshiev.
Alaida, juma kúni keshke S.Shámshievtiń úiine politseiler kelip, Arman Qudaibergenov týraly surai bastapty.
- Olar maǵan Qudaibergenovtiń sýretin kórsetip, tanisyz ba dep surady. Men tanitynymdy aittym. Sóitsem, ol Denis Tenniń ólimine kúdiktilerdiń biri eken. tań qaldym. Ol Astanada qamaýda otyr emes pe, al qylmys Almatyda bolǵan, bul qalai desem, qolhatpen bosatyp jibergenderin aitty.
- Iaǵni, búgin Astanada onyń ústinen sot bolýy tiis edi ǵoi? - dep surady Shámshievten "Vremia" gazetiniń tilshisi.
- Iá, eger ony qolhatpen bosatpaǵanda ol qashyp ketpes edi jáne Denis Tennen airylyp qalmas edik...
- Sizden aqparatty jariialamaýǵa qolhat jazdyryp alǵan joq pa?
- Joq, biraq bul týraly eshkimge aitpaýymdy ótingendei boldy, dostaryma da, týystaryma da. Men biraq mundai jaitty aitpai qalýǵa bolmaidy dep sheshtim. Barlyq jerde Arman Qudaibergenov týraly jazyp jatyr, biraq onyń osy sońǵy isi týraly eshkim jaq ashpady. Sosyn aita keterligi, Qudaibergenov meniń kóligimniń ainasyn da pyshaqpen sheship alǵan. Eger men sol jerde bolǵanymda ol meni de óltirer edi. Mine, bizdiń politseiler osyndai asa qaýipti qylmyskerdi bosata salǵan. Qudaibergenov politseilermen bailanysta bolǵan siiaqty kórindi, óitkeni ol ózin tym erkin ustady, - deidi astanalyq turǵyn Sapar Shámshiev.
Eske salaiyq, 19 shilde kúni Almatyda dańqty sportshy, Olimpiada oiyndarynyń qola júldegeri Denis Tendi kólik ainasyn urlaýshylar pyshaqtap óltirgen bolatyn. Politseiler bul qylmysqa qatysy bar degen kúdikpen eki adamdy ustady. Olardyń biri Arman Qudaibergenov bolsa, ekinshisi Nuraly Qiiasov. Ekeýi de 1994 jyly týǵan jas azamattar.
