Politsiia Denis Tenniń ólimine qatysy bar ekinshi kúdikti – Qyzylorda oblysynyń 24 jastaǵy turǵynyn izdep jatyr, dep habarlady ishki ister ministrligi baspasóz qyzmeti.
"Denis Tendi óltirdi degen ekinshi kúdiktini izdeýge búkil jeke quram men aimaqtyq ishki ister departamentteriniń basqa da kúshteri jumyldyrylǵan. 1994 jyly týǵan Qyzylorda oblysy turǵyny Qudaibergenov Arman Búribaiuly izdestirilip jatyr", — dep málimet berdi vedomstvo.
Kúdiktiniń túr-sipaty: aryq deneli, boiy — 165-170 santimetr, qara fýtbolka men sur djinsy kigen, qara tústi aiaq kiimi jáne kúnnen qorǵaityn kózildirigi bar.
Kúdiktiniń qaida júrgeni týraly qandai da aqparat belgili bolsa, ishki ister ministrligi Almaty IID-ine habarlasýdy suraidy: 8 (7272) 54-40-42, 54-40-18, 54-41-00, 54-43-66 nemese 102.
Vedomstvo atap ótkendei, qylmystyq isti tergeýge IIM men Almaty IID-niń eń tájiribeli qyzmetkerlerinen jedel tergeý toby quryldy. Ony ishki ister ministriniń birinshi orynbasary Janat Súleimenov basqarady.
Aita keteiik, belgili qazaqstandyq mánerlep syrǵanaýshy Denis Ten pyshaqtan alǵan jaraqatymen aýrýhanaǵa 19 shilde kúni tús kezinde jetkizildi.
Almaty qalalyq IID-niń málimetteri boiynsha, belgisiz bireýler sportshynyń kóliginiń ainasyn urlamaq bolǵan.
Oqiǵanyń ústinen túsken sportshyny urylar jambasynan jaraqattaǵan.
Sportshy 3 litr qan joǵaltqan. Dárigerler onyń jaǵdaiyn óte aýyr dep baǵalady.
Keshirek QR Densaýlyq saqtaý ministrliginiń baspasóz hatshysy Ernar Ákimqulov sportshynyń qaza bolǵandyǵyn jariialady.
Búgin QR Ishki ister ministrligi Denis Tenniń ólimine kúdiktilerdiń biriniń ustalǵanyn jariia etti.
Sondai-aq prokýratýra ókilderi ustalǵan kúdiktiniń qylmys jasaǵanyn moiyndaǵanyn jariialady.
