Foto: ashyq derekkóz
Qazaqstandyq mánerlep syrǵanaýshy Denis Tenniń ólimine kinálilerdiń jazasy jeńildegeni belgili boldy. Bul týraly "Ult aqparat" Tengrinews.kz saityna silteme jasap habarlaidy.
Nuraly Qiiasov pen Arman Qudaibergenov 2019 jyly 17 qańtarda Denis Tenniń ólimine kináli dep tanylyp, 18 jylǵa bas bostandyǵynan aiyryldy. Olarǵa jazasyn qatań rejimdegi koloniiada óteý týraly úkim shyqty. Sottalǵandar Almaty oblysy Zarechnyi kentindegi LA-155/12 túzeý mekemesine jiberildi.
Al olardyń sybailasy Janar Tolybaevaǵa 4 jylǵa bas bostandyǵynan aiyrý jazasy taǵaiyndaldy. Ol jazasyn qaýipsizdigi ortasha mekemede ótedi. Alaida 2019 jyldyń jeltoqsanynda ol qamaýdan bosatyldy. Sot onyń densaýlyq jaǵdaiyn jáne qamaýda ekinshi balasyn dúniege ákelgenin eskerip, jazanyń ótelmegen bóligin bas bostandyǵyn shekteýmen aýystyrý týraly sheshim qabyldady. Ol keiinirek koloniiaǵa oralyp, 2021 jyldyń jeltoqsanynda túbegeili bosatyldy.
Araǵa ýaqyt salyp sportshyny óltirgen qylmyskerlerdiń jazasy jeńildegeni belgili boldy.
"2023 jyly 19 qazanda Qonaev qalalyq soty Almaty oblysy boiynsha QAJ departamentiniń №12 mekemesi basshysynyń qatań rejimdegi mekemede otyrǵan Nuraly Qiiasovtyń jazasyn jeńildetý týraly usynysyn qarady. Buǵan 2023 jylǵy naýryzda qabyldanǵan "Keibir zańnamalyq aktilerge qylmystyq is júrgizý jáne jazany atqarý salasyndaǵy adam quqyqtary máseleleri boiynsha ózgerister men tolyqtyrýlar engizý týraly" jańa Zań sebep bolǵan. Zańǵa sáikes, qasaqana qylmys jasaǵany úshin eki jyldan astam merzimge sottalmaǵan, buryn sońdy bas bostandyǵynan aiyrylmaǵandar jazasyn qylmystyq-atqarý júiesiniń qaýipsizdigi ortasha mekemelerinde óteýge tiis", – dep jazdy basylym.
Sondai-aq Almaty oblysynyń qylmystyq-atqarý júiesi departamenti 7 ai 29 táýlik tergeý izoliatorynda bolý merzimi kúnine jarty táýlikpen eseptelýin, iaǵni taǵy 4 aidy merzimge qosýdy usynǵan.
Sot Qazaqstan Respýblikasynyń 2023 jylǵy 17 naýryzdaǵy Zańyn basshylyqqa ala otyryp, Almaty oblysy jáne Jetisý aýdany boiynsha qylmystyq-atqarý júiesi departamentiniń №12 mekemesi basshysynyń qamaýda ustaý merzimin esepteý týraly usynysyn qanaǵattandyrý týraly sheshim qabyldady. Almaty qalasynyń qylmystyq ister jónindegi mamandandyrylǵan aýdanaralyq sotynyń 2019 jylǵy 17 qańtardaǵy úkimimen sottalǵan Qiiasov Nuraly Daýletbekulyna taǵaiyndalǵan jazany óteý orny qylmystyq-atqarý júiesiniń qaýipsizdigi ortasha mekemesi bolyp belgilendi.
Ekinshi sottalýshy Arman Qudaibergenovke de qatysty osyndai usynys qaraldy. Sýdia sonymen qatar onyń úkim shyǵarylǵanǵa deiin qamaýda bolǵan 4 aiyn sanap, ony qatań rejimdegi mekemeden qaýipsizdigi ortasha mekemege aýystyrý týraly sheshim shyǵarǵan.
"Qazir Arman Qudaibergenov pen Nuraly Qiiasov Jambyl jáne Shyǵys Qazaqstan oblystaryndaǵy qaýipsizdigi ortasha túzeý mekemelerinde jazasyn ótep jatyr. Olar koloniiada jumys istemeidi, óitkeni onda jumys orny tapshy. Olarǵa qalypty jaǵdai jasalǵan. Qylmystyq-atqarý kodeksine sáikes, olar jylyna eki uzaq jáne alty qysqa merzimdi kezdesýge shyǵýǵa quqyly", – delingen habarlamada.
Buǵan deiin Arman Qudaibergenov te, Nuraly Qiiasov ta densaýlyǵyna shaǵymdanbaǵan.
Aita ketsek, Denis Ten 2018 jyldyń 19 shildesinde urylar qolynan qaza tapty. Qaiǵyly oqiǵa 2018 jyldyń 19 shildesinde Almatyda bolǵan. Denis kafeden shyǵyp, kóliginiń ainalaryn eki jigittiń urlap jatqanyn kóredi. Qasha jónelgen olardy qýyp jetken sportshyǵa bir ury jambasynan pyshaq salady. Nátijesinde arteriiasy zaqymdalyp, qóp qan ketedi. Keiin sportshy aýrýhanada kóz jumdy.
