Almaty qalalyq sotyna Denis Tenniń ólimine ekinshi kúdikti Arman Qudaibergenovti syrttai qamaýǵa alý týraly ótinish tústi, dep habarlaidy "Ult aqparat".
«2018 jyly 20 shildede Denis Tenniń ólimine qatysty iske bailanysty Almaly aýdandyq sotyna Qudaibergenov Arman Bóribaiuly degen tulǵany syrttai qamaýǵa alý týraly ótinish kelip tústi. Kúdikti QR QK 99-baby 2-bólimimen aiyptalyp otyr», - dedi qalalyq sottyń baspasóz qyzmetinen.
Aita ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
Búgin belgili bolǵandai, sportshynyń ólimine qatysy bar eki kúdiktiniń biri ustalyp, ol qylmysyn moiyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqai aýylynyń týmasy Arman Qudaibergenovke izdeý jariialandy.
