Almatyda Denis Tenniń ólimine kúdikti 3 adamdy qamaýda ustaý merzimi taǵy 15 táýlikke sozyldy, dep habarlaidy QazAqparat qalalyq sottyń baspasóz qyzmetine silteme jasap.
«Almaty aýdanaralyq mamandandyrylǵan tergeý sotynyń sheshimimen kúdiktilerdiń biri QR QK 434-baby, QR QK 24-babynyń 3-bólimi, 188-babynyń 2-bóliminiń 1-tarmaǵy boiynsha aiyptalǵan J.Tolybaeva qamaýda 22 qarashaǵa deiin otyratyn boldy. Al QR QK 188-babynyń 2-bóliminiń 1-tarmaǵy, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Arman Qudaibergenov 19 qarashaǵa deiin qamaýda otyrady. QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Nuraly Qiiasovty qamaýda ustaý merzimi uzartyldy. Ol 18 qarashaǵa deiin qamaýda bolady», - dedi qalalyq sottyń baspasóz hatshysy Dias Mahambetov.
Eske salsaq, qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy men Baiseiitova kósheleriniń qiylysynda 19 shildede kúndizgi saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusynan jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi.
Biraq Almaty qalalyq densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekenin málim etken bolatyn. 2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy. Keiin belgili bolǵandai, sportshynyń ólimine qatysy bar kúdiktiler ustalyp, qylmystaryn moiyndaǵan.
