Almatyda sportshy Denis Tenniń ólimi boiynsha sot otyrysynda jaryssóz ótip jatyr. Sot barysynda prokýror úsh sottalýshyny jalpy alǵanda 44 jylǵa bas bostandyǵynan aiyrýdy surady, dep habarlaidy QazAqparat tilshisi.
«Bul oqiǵa qoǵamda úlken rezonans týdyrdy. Kúndiz, halyqtyń kózinshe adam óltirý qylmysyna zań boiynsha eń aýyr jaza qoldanylýy kerek.Osy qylmys qoǵamdyq tərtipti saqtaý salasyndaǵy kóptegen məselelerdi ashty. Júrgizilgen sotqa deiingi tergeý barysynda sottalýshylarǵa taǵylǵan aiyp tolyǵymen dəleldendi dep sanaimyn. Arman Qudaibergenovti QR QK 188-babynyń 2-bólimi, 192-babynyń 2-bólimimen, 99-babynyń 2-bólimimen aiypty dep taýyp, ony túpkilikti 20 jylǵa bas bostandyǵynan aiyrýyńyzdy suraimyn.
Nuraly Qiiasovty QR QK 192-babynyń 2-bólimimen, 99-babynyń 2-bólimimen aiypty dep taýyp, ony túpkilikti 20 jylǵa bas bostandyǵynan aiyrýdy suraimyn. Ekeýiniń ərqaisysynan 30 AEK kóleminde aiyppul óndirýdi suraimyn. Janar Tolybaevany júktiligi men 4 jastaǵy balasynyń baryn eskere otyryp, QR QK 58-babyn qoldana kele QR QK 188-babynyń 2-bólimi, 434-babymen aiypty dep taýyp 4 jylǵa bas bostandyǵynan aiyrýdy suraimyn. Ol jazasyn orta qaýipsizdiktegi jazalaý ornynda ótesin», - dedi prokýror Qýandyq Dosov.
Al Oksana Ten sýdiaǵa óz ótinishin jetkizdi. Ol sottalýshylarǵa taǵylǵan baptarǵa qosymsha qosýdy surady. Atap aitqanda, QR QK 99-babynyń 2-bólimi, 8 tarmaǵy - jaldanyp adam óltirý týraly bapty qosýdy surady.
«Osy məselege bailanysty Almaty qalalyq prokýrorynyń atyna sottalýshylarǵa QR QK 99-babynyń 2-bólimi, 8 tarmaǵy - jaldanyp adam óltirý degen aiypty taǵý týraly jeke qaýly shyǵarýyńyzdy suraimyn»,- dedi Denistiń anasy Oksana Ten.
Eske salsaq, Denis Tendi ótken jyldyń 19 shildesinde Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn. Denis Tenniń ólimine qatysty qylmystyq is qozǵalyp, kúdiktiler izdestirildi. Keiin QR IIM kúdiktilerdiń ustalǵanyn jariia etti.
Aita keterligi, sottyń sońǵy otyrysynda sottalýshy Nuraly Qiiasov óz kinəsin ishinara moiyndaǵan bolatyn.
