Almatyda sportshy Denis Tenniń ólimi boiynsha sot barysynda sottalýshy Nuraly Qiiasovtan jaýap alyndy, dep habarlaidy QazAqparat tilshisi.
«Meni ne úshin aiyptap jatqanyn túsinip otyrmyn. Men óz kinámdi tolyǵymen túsinemin. Biraq aldyn ala kelisip alyp óltirdi degen sózge kelispeimin», - dedi Nuraly Qiiasov.
Ótken aptada basqa da sottalýshylar Janar Tolybaeva men Arman Qudaibergenovten jaýap alyndy.
Nuraly Qiiasov bolǵan oqiǵa týraly baiandap berdi.
Onyń aitýynsha, Arman birinshi ainany kóliktiń sol jaǵynan sheship, joldorbaǵa salyp qoiǵan. Ekinshisin adam aiaǵy siregen soń almaqshy oimen kúte turady.
Qiiasovtyń mindeti ainalany sholyp turý bolǵan.
«Men shamamen 7 metrge qashyqtadym. Temeki shegý úshin. Osy ýaqytta Arman Qudaibergenov ekinshi ainany sheship úlgerdi. Al sol kezde kóliktiń iesi kelip qalǵanyn kórmei qalyppyn. Arman sport alańyna qarai qasha jóneldi. Ol kólikke soǵylǵanyn men kórmedim. Denis (Ten) ony artynan qýa jóneldi. Biraz ýaqytta qýyp jetip aldy», - dedi ol.
Onyń aitýynsha, Denis pen Arman tóbelesken kezde ol trotýarda shylym shegip otyrǵan.
«Arman qashyp ketedi dep oiladym. Qarap baqylap otyrdym. Arman beldigin shyǵaryp ura bastady. Onyń setkaǵa qarai qulaǵanyn kórip, Denistiń art jaǵynan keldim de tartyp qaldym. Ol maǵan qarady. Sol sátte qolymdaǵy pyshaqty kórsettim. Ol qorqatyn shyǵar dep oiladym. Ol qoryqpady. Men Deniske qalai pyshaq suqqanymdy bilmei qaldym. Men onyń basqa jerinen salsam da bolar edi pyshaqty. Sanyna salyp, qashyp ketem dep oiladym. Men art jaǵynan sol jaq tusynan pyshaq saldym. Pyshaqty tóbeles bolǵan jerden 15-20 metr qashyqtyqta laqtyryp kettim. Men barlyq qazaqstandyqtardan, ásirese anasy Oksana Alekseevnadan keshirim suraimyn. Onyń júregi qalai aýyryp turǵanyn túsinemin. Keshire alsańyz, meni keshirińiz», - dedi Nuraly Qiiasov.
Eske salsaq, Denis Tendi biyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn. Denis Tenniń ólimine qatysty qylmystyq isqozǵalyp, kúdiktiler izdestirildi.
Elbasy Denis Tenge qatysty qylmysty muqiiat tekserýdi tapsyrdy. Keiin QR IIM kúdiktilerdiń ustalǵanyn jariia etti. Al, qyrkúiek aiynyń sońynda Ishki ister ministri Qalmuhanbet Qasymov atalmysh qylmystyq istiń tergelýine qatysty málimet bergen bolatyn. Búgin Almaty qylmystyq ister boiynsha aýdanaralyq mamandandyrylǵan sotta belgili sportshynyń ólimi boiynsha aldyn ala sot tyńdalymy ótti.
