«QazAqparat» HAA Almatydaǵy tilshisi qaladaǵy avtobólshekter dúkenderine arnaiy baryp, Lexus GX460 kóliginiń ainasynyń qunyn bilip qaitypty.
Dál osy GX460 kóliginiń ainasy úshin Olimpiada júldegeri Denis Ten qyrshynynan qiylǵan bolatyn.
Eń aldymen tilshi «Niý Parts» avtobólshekter dúkeniniń ókilderine habarlasqan.
«Ainanyń tek áinegi 5 myń teńgeden bastalady. Onyń ainasy nómirlenbegen. Negizi urlamaý úshin arnaiy lazermen gravirlenedi. Sonda ainany eshkim urlai almaidy. Sebebi, ony satsa erteń ustalyp qalady. Eger gravirovka tursa, onda urylar jolamas edi. Ainany 10 myńǵa gravirleýge bolady. Denistiń kóliginiń ainasy jalpy jiyntyǵymen shamamen 150 myń teńge turady. Ony urylar bazarlarda 50 000 teńgege satyp jibere alady», - depti avtobólshek dúkeniniń ókili Alla.
Sondai-aq, QazAqparat tilshisi Almatydaǵy avtobólshek saýda bazarynda bolyp, jaǵdaidy óz kózimen kórgen.
Qaiǵyly oqiǵadan soń bul bazarda politsiia qyzmetkerleriniń qarasy kóbeigen eken. Saýdagerler de jantúrshigerlik qazany ózara talqylap jatqan kórinedi.
Satýshylardyń biri óz áńgimesinde kólik ainasyn urlaý qylmysy 10 jyldan beri bar ekenin aitqan.
«Men ózim urlanǵan zattardy satpaimyn. Biraq ony satatyndar kóp... Ondai adamdar kelgende birden aitamyn. Jas kezińde toqta, keiin ókinesiń deimin», - depti satýshy Alla.
Al Shahmurat esimdi saýdager avtobólshek urlap satýdyń úlken bizneske ainalǵanyn atap ótken.
«Bul jigitter osylai ońai olja taýyp kelgen. Jumysqa kúndiz kiriskenine qaraǵanda, olar naǵyz «ákki ury» bolyp otyr. Óitkeni, tek myqtylar ǵana kúndiz birneshe minýt ishinde ainany sheship kete alady. Olar bir túnde 10 kóliktiń ainasyn qoldy etedi», - depti Shahmurat.
Onyń aitýynsha, urylar birden urlanǵan dúnieni tyqpalamaidy.
«Olardyń óz kanaldary bar. Tek solar arqyly klient tabady. Ustalǵan urylar kóp ýaqyt ótpei qaitadan «kásibimen» ainalysyp júre beredi», - deidi ol.
Urylar ainany 30-40 myń teńgege satyp jiberýi múmkin. Al odan ári aina qaita jasalyp, 100 myń teńgege satylyp ketýi de ǵajap emes.
Aita ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
Búgin belgili bolǵandai, sportshynyń ólimine qatysy bar eki kúdiktiniń biri ustalyp, ol qylmysyn moiyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqai aýylynyń týmasy Arman Qudaibergenovke izdeý jariialandy.
