Mánerlep syrǵanaýshy Denis Tenge qastandyq jasady degen kúdikpen ustalǵan Nuraly Qiiasov pen Arman Qudaibergenovtyń bergen túsiniktemeleri ártúrli, dep habarlaidy QazAqparat tilshisi QR Ishki ister ministriniń orynbasary Rashid Jaqypovqa silteme jasap.
Buǵan deiin Nurlan Qiiasov «Denis Tendi urmadym, pyshaq salmadym, jái ǵana qarap turdym» dep málimdegen bolatyn. Keiinirek ekinshi kúdikti Arman Qudaibergenov sportshyǵa eki ret pyshaq salǵanyn moiyndady. Alaida, betpe-bet kezdesý barysynda Nurlan Qiiasov pyshaqty ózi salǵanyn moiyndady.
«Kúdiktilerdiń aýyr qylmysty bir-birine silteýi búgin ashylǵan jańalyq emes. Qazirgi ýaqytta oqiǵanyń mán-jaiyn, qai kúdiktiniń pyshaq jumsaǵanyn tolyq anyqtaýǵa múmkindik beretin saraptamalar júrgizip jatyrmyz. Eki kúdiktiniń túsiniktemeleri bir-birine qaishy kelip tur, naqty saraptamalardan soń pyshaqtyń kimniń qolynda bolǵanyn naqty anyqtaimyz», - dedi QR Ishki ister ministriniń orynbasary Rashid Jaqypov Denis Ten ólimin tergeý týraly arnaiy brifingte.
Eske sala ketsek, qazaqstandyq mánerlep syrǵanaýshy, Sochi Olimpiadasynyń qola júldegeri Denis Ten 19 shilde kúni Almatyda avtokólik urylarynyń qolynan qaza tapty. Sportshy turaqta turǵan kóliginiń ainasyn urlamaq bolǵan qaskóilerdiń ústinen túsken. Arada janjal shyǵyp, saldarynan kúdiktiler Denis Tenge pyshaq suǵyp alady.
Sportshy 3 litr qan joǵaltqan. Dárigerler 2,5 saǵat boiy onyń ómiri úshin kúreskenmen, ajaldan arashalap qala almady. Denis Ten 17:30-da aýrýhanada jan tapsyrdy.
Atalǵan faktige qatysty qylmystyq is qozǵaldy. QR prezidenti Nursultan Nazarbaev bas prokýror men ishki ister ministrine istiń jiti jáne obektivti tergelýin qamtamasyz etýdi tapsyrdy.
20 shilde kúni tańerteń mánerlep syrǵanaýshynyń ólimine kúdikti Nuraly Qiiasov ustaldy. Ol Jambyl oblysynyń týmasy, 24 jasta. Sol kúni keshke ekinshi kúdikti Qyzylorda oblysynyń týmasy Arman Qudaibergenov ustaldy.
Al búgin Denis Tenniń ólimine qatysty tyń derekter shyqty. Almaty IID aqparatynsha, oqiǵany kózben kórgen adamdar tabylǵan. Betpe-bet kezdesý barysynda Nuraly Qiiasov Denis Tenge pyshaq suqqanyn moiyndady. Buǵan deiin Arman Qudaibergenov pyshaq jaraqatyn salǵanyn aitqan edi. Eki kúdikti de buryn zańdy buzǵan.
