Denis Ten qaza bolǵan jerden 150 metr qashyqtyqta taǵy bir kólikke shabýyl jasaldy, dep habarlaidy Tengrinews.kz. Bul týraly kóliktiń iesi, Almaty turǵyny, belgili jazýshy Ilia Odegov Facebook paraqshasynda jazdy.
"Búgin túnde, shamamen saǵat 03.00-de belgisiz bireýler kóligimniń terezesin shaǵyp, ishine kirmekshi boldy. Oqiǵa Denis Ten qaitys bolǵan jerden 100-150 metr jerde, úidiń janynda boldy", dep jazdy Odegov.
Onyń aitýynsha, bul úide turyp jatqanyna kóp bolǵan. Kóligi sol jyldardan beri aýlada turady. "Syzyp ketken kezder, qalpaqshalardy, usaq-túiekterdi alyp ketken kezder bolǵan, biraq aitarlyqtai qastandyq bolǵan emes. "Onyń ústine, kóligimde qundy zat bolmaidy, kóshedegi shamnyń týra astynda tur, salonnyń bos ekenin syrttan-aq kórýge bolady. Qasymyzdaǵy úidiń qabyrǵasynda kamera tur. Uiyqtaǵan joq edim, kósheden bir dybys estilip, dabyl qaqqysh iske qosyldy. Terezeden qarasam, kóliktiń janynda adamdar júr. Eki jigit", - dedi Odegov.
"Ondai adamdarmen betpe-bet kelýdiń qanshalyqty qaýipti ekenin jaqsy bilemin. Denis Tenmen bolǵan tragediia - osyǵan mysal. Biraq túsinbeimin, seniń jeke zatyńa tiisip jatqanyn kóre tura, basyn qumǵa tyqqan túiequs siiaqty qalai tyǵylýǵa bolady. Bul bálkim, túisik shyǵar, qorǵaý túisigi, basqasha áreket etý ózińniń álsizdigińdi, jasyqtyǵyńdy moiyndap, tulǵa retinde kúiregenińdi bildiretin shyǵar. Birneshe jyl buryn basqa aýdanda kóligimniń ainasyn urlap, men oilanbastan olardy qýa jóneldim, biraq jete almadym. Ol kezde de, qazir de olarǵa jetsem ne isteitinimdi oilaǵan joqpyn, oilaǵym kelmeidi de.
Bul túni kóshege buraǵysh kiltti qolyma ala sap júgirdim (basqa nemen qarýlanýǵa bolatynyn oilamadym). Kóliktiń janynda eshkim bolmady. Men qylmyskerlerdi qorqyttym, biraq olar uzap ketti dep oilamaimyn. Qarańǵyda aýladan dybystar estilip jatty", - dep jazdy almatylyq áleýmettik jelide.
Zardap shegýshiniń aitýynsha, ol politsiiaǵa aryzdanǵan. Alaida bul is tańǵa deiin jalǵasqan.
"Túndegi oqiǵadaǵy eń qorqynyshtysy - bul oqiǵa Denis Tenniń kóliginiń ainasyn sheship alýǵa tyrysqan kúnnen bir kún ótkende jáne tap sol aýdanda bolǵany. Shýǵa qaramastan, bizdiń aýdanda qazir politseilerdiń júrgenine qaramastan bolyp otyr, demek, urylar esh nárseden qoryqpaidy", - dedi ol.
Eske sala ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
