Foto ©️ Tengrinews.kz / Turar Qazanǵapov
Astanadaǵy Kaspi bank filialynda adamdardy kepilge alǵan er azamattyń denesi men qolynda jarylǵysh zat bolǵan. Bul jaiynda Ishki ister ministriniń birinshi orynbasary Marat Qojaev QazAqparat tilshisine bergen suhbatynda aitty, dep habarlaidy «QazAqparat» HAA.
Marat Qojaev qaskóimen kelissóz júrgizý kezindegi IIM qyzmetkerleriniń jumysy jaily tarqatyp aityp berdi.
«Adamnyń aty-jónin jyldamyraq anyqtasaq, onymen kelissóz júrgizý de jeńilirek bolady. Al bul jaǵdaida biz onyń týǵan-týystaryn tarttyq. Ony sýretke túsirip alyp, jyldam bazamyzdan qarap, aty-jónin anyqtadyq. Degenmen, bastapqyda ol múldem basqa adamnyń atyn aitqan bolatyn. Biz Dilshot degen adammen kelissóz júrgizgen edik», - dedi Marat Qojaev.
Sál keiinirek, sýret arqyly onyń naqty kim ekeni anyqtaldy. Ol Jambyl oblysynyń Grodekovo eldi mekeniniń týmasy Álihan Mýradov bolyp shyqty. Derekter adam jaily aqparat jinaýǵa, onyń minez-qulqyn tanyp bilýge, jaqyn týǵan-týystarynyń kim ekendigin anyqtaýǵa múmkindik berdi.
«Biz Jambyl oblysyna habarlasyp, ondaǵy bólimshemiz tez arada onyń týǵan-týystaryn tapty. Solar arqyly oǵan áser etýge tyrystyq. Sol arqyly ol jasaýy múmkin is-árekettiń qaýpin azaittyq. Beibit jolmen sheshýge tyrystyq. Kelissózderdiń esh áseri bolmaǵan jaǵdaida bizdiń arnaýly bólimshemiz áreket etýi tiis boldy», - dedi ministrdiń birinshi orynbasary.
Onyń aitýynsha, tosyn jai bolǵan kezde Astana qalalyq politsiia departamentiniń «Arlan» jasaǵy iske kirisýge tiis edi. Arnaýly jasaq óziniń shtattyq kestesine sai qarýlanǵan. Quramynda túrli mamandar bar. Máselen, qatty dybys shyǵaratyn granata laqtyratyn maman boldy. Granata laqtyrǵan kezde jar-jurq etip, sanaýly sekýndtarda qylmysker daǵdaryp qalady. Al sol ýaqytta shabýyldaýshylar qylmyskerge jetip, ony qarýsyzdandyrýy tiis.
Marat Qojan IIM bólimshesi óte jyldam ári múltiksiz jumys istedi dep sanaidy. Qylmysker de, tutqyndaǵy bank qyzmetkerleri de zardap shekken joq.
Sonymen qatar ol qaskóide qandai qarý boldy degen saýalǵa jaýap berdi.
«Onda tapanshaǵa uqsas zat boldy. Sonymen qatar qoly men denesine qoldan jasalǵan jarylǵysh qurylǵyǵa uqsas zat tańyp alǵan. Qazirgi ýaqytta bul zattar saraptamaǵa berildi. Olardyń qanshalyqty jarylǵysh zat ne mýliaj ekendigin saraptama anyqtaidy», - dedi Marat Qojaev.
