Memleket qairatkeri Dinmuhamed Qonaevtyń eskertkishine jieni Janar Muqajanova óz oiyn bildirdi, dep habarlaidy QazAqparat.
«Bul qaidan kelgen músinshi dep qaldyq. Eń bolmaǵanda týystarynan ruqsat suramai ma? Aqyldaspai ma? Meniń oiymsha múldem alyp tastap, basqasha qoiý kerek», - deidi D. Qonaevtyń jieni Janar Muqajanova.
Esterińizge sala keteiik, Almaty oblysynyń Baqanas aýylynda memleket qairatkeri Dinmuhamed Qonaevqa eskertkish qoiyldy. Alaida bul músin kópshiliktiń narazylyǵyn týǵyzdy. Halyqtyń aitýynsha, eskertkishtiń pishini men kólemi sai emes.
«Bul - qazaq eliniń qalyptasýyna qomaqty úles qosqan saiasatkerdi keleke etý» deidi týystary. Zańǵar tulǵanyń týǵan óńirinde tas músinniń tuǵyrǵa qoiylǵan sáti áleýmettik jelide de qyzý talqylanyp jatyr.
Salmaǵy 14 tonna tas músindi tuǵyryna qondyryp halyqtyń súiinshilei bastaǵany sol-aq edi, eskertkish eldiń qatań synyna ushyrady.
Birden aitý kerek. Eskertkishke biýdjetten qarjy bólingen joq. Aýyzbirlik tanytqan halyqtyń yqylasy. Alaida qoǵamdyq qor jergilikti bilikpen kelispei tuǵyrǵa qondyrǵan.
«Áleýmettik jelige shyqqan eskertkish sýretteri men bizge usynylǵan eskiz jobadaǵy sýretterdiń aiyrmashylyǵy anyqtalyp, arnaiy jumysshy top qurylyp, Balqash aýdany Baqanas aýylyna issaparǵa jiberildi», - deidi Almaty oblystyq mádeniet basqarmasy basshysynyń orynbasary Áliia Jaqypbekova.
Synǵa ushyraǵan eskertkish saltanatty túrde ashylyp úlgergen joq. Tuǵyrynan alynatyn boldy.
Jalpy zań boiynsha mádeniet jáne sport ministrliginiń arnaiy kelisimi shyqpai, óz erkimen eskertkish qoiýǵa ruqsat joq.
