Aq úi AQSh kongresine Prezident Donald Tramptyń buiryǵymen jasalǵan 3 qańtar kúngi shabýyl jaily resmi eskertý joldady. Bul shabýyldyń saldarynan irandyq general Kasem Sýleimeni qaza tapqan.
Eskertý 1973 jyly qabyldanǵan AQSh zańy aiasynda 4 qańtarda jiberilgen. Bul zańǵa sáikes, prezident ákimshiligi 48 saǵattyń ishinde kongreske áskeri áreket nemese aldaǵy jospar jaily habarlama jiberýi tiis.
Aq úi eskertýge bailanysty túsinikteme bermedi, onyń jai-japsary da aitylmaidy. Eskertýdiń óńdelgen nusqasy jariialana ma, jariialanbai ma, ol jaǵy da belgisiz.
Respýblikashyldardyń basym bóligi Tramptyń áreketin joǵary baǵalady, al ókilder palatasyndaǵy demokrattar prezidentti kongresti eskertpei, onyń maquldaýynsyz áreket etkenin synady. Demokrattar bul áreket AQSh pen Iran arasyndaǵy soǵysqa túrtki bolýy múmkin dep alańdaidy.
Ókilder palatasynyń spikeri Nensi Pelosi Aq úidiń eskertýi "jaýaptan kóri kóbirek suraq týyndatady" dep málimdedi.
3 qańtarda AQSh prezidenti Donald Tramp "soǵysty toqtatý úshin" Irannyń áskeri qolbasshysy Kasem Sýleimanige shabýyl jasaýǵa buiryq bergenin málimdegen. Onyń aitýynsha, general Baǵdatta AQSh pen onyń odaqtastaryna qarsy "qaterli" shabýyldar uiymdastyrǵan.
62 jastaǵy Sýleimani Islam revoliýtsiiasy saqshylary korpýsynyń elitalyq jasaǵy "ál-Qudys" bólimin basqarǵan. AQSh-ta ony sheteldegi terroristik uiymdar qataryna engizdi.
