Búgin Májilistiń jalpy otyrysynda «Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasynyń Konstitýtsiialyq zańyna tolyqtyrýlar engizý týraly» Konstitýtsiialyq zańynyń jobasy maquldandy. Osyǵan orai, tanymal qazaqstandyq saiasattanýshy, «Birgemiz» qoǵamdyq qory qamqorshylyq keńesiniń múshesi Erlan Sairov pen QR Prezidenti janyndaǵy Ulttyq qoǵamdyq senim keńesiniń múshesi Marat Shibutov Memleket basshysynyń parlamenttik oppozitsiia institýty bastamasy jónindegi pikirlerimen bólisti.
«Bul QR Prezidenti Qasym-Jomart Kemeluly Toqaevtyń Ulttyq senim keńesi aiasynda usynǵan saiasi reformalar toptamasynyń biri. Bul toptama aýqymdy ári ekijaqty mánge ie. Birinshiden, oppozitsiianyń destrýktivti emes ekendigi aitylady. Oppozitsiia - bul elimizdiń damý maqsattaryna qol jetkizýdegi memleket seriktesi. Qundylyq deńgeiinde munyń óte úlken máni bar», - dedi Erlan Sairov «QazAqparat» tilshisimen telefon arqyly suhbattasý barysynda.
Onyń aitýynsha, ekinshiden, zańnamalyq deńgeide oppozitsiialyq qyzmet pen parlamenttik azshylyq qyzmetine kepil bekitiledi.
«Iaǵni, Parlament ishinde belgili bir artyqshylyqqa, sonymen qatar parlamenttik azshylyq ókiliniń naqty bir laýazymdy ielenýine kepildik beriledi. Bul álemdik tájiribe sanalady. Sondyqtan Qazaqstan búgingi kúni saiasi reformalardy ilgeriletýde demokratiianyń halyqaralyq standarttaryna sai keledi dep aitýǵa bolady. Qazirgi ýaqytta biz dál soǵan qarai kele jatyrmyz», - dedi saiasattanýshy.
Al Marat Shibutov parlamenttik oppozitsiia institýty jaiynda uzaq ýaqyttan beri aitylyp kele jatqandyǵyn eske salyp ótti.
«Ulttyq qoǵamdyq senim keńesi aiasynda bul ideia jandana tústi. Biz de bul jaiynda bastama kótergen edik. Alaida depýtat Azat Perýashev bul zańdy ázirlep shyqty. Árine, bul quqyqtardyń munan da kóp bolǵanyn qalaǵanymyzben osynyń ózi de táýir. Árbir partiia bir komitet basshylyǵyna ie bolǵanyn qalar edim. Bul jerde bir tóraǵa laýazymy men komitetterdiń 2 hatshylyq laýazymy jaiynda ǵana aitylǵan. Munyń ózi de jap-jaqsy. Bir sessiiada parlamenttik tyńdaýǵa bastamashylyq jasaý da durys. Bul Parlamenttegi oppozitsiialyq partiianyń múmkindikterin aitarlyqtai arttyra túser edi. Bul - demokratiiaǵa qarai qadam», - dedi QR Prezidenti janyndaǵy Ulttyq qoǵamdyq senim keńesiniń múshesi.
Esterińizge sala ketsek, búgin Májilistiń jalpy otyrysynda «Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasynyń Konstitýtsiialyq zańyna tolyqtyrýlar engizý týraly» Konstitýtsiialyq zańynyń jobasy maquldandy.
Zań jobasynyń negizgi maqsaty - qoldanystaǵy zańnamada «parlamenttik kópshilik» jáne «parlamenttik oppozitsiia» uǵymdaryn bekitý boiynsha quqyqtyq negizderdi qamtamasyz etý. Máselen, parlamenttik oppozitsiiaǵa qandai da bir másele boiynsha óz ustanymyn bildirýge kepildik berý maqsatynda zań jobasynda saiasi partiialar fraktsiialary basshylarynyń Parlament Palatalarynyń birlesken otyrystarynda, Parlament Májilisiniń jalpy otyrystarynda, turaqty komitetterdiń, jumys toptarynyń otyrystarynda, parlamenttik tyńdaýlar men ózge de is-sharalarda sóz sóileýge kepildik berilgen quqyǵyn bekitý kózdeledi.
