Jyl basynan beri Almaty qalasynda 17 498 sábi dúniege keldi. «Azamattarǵa arnalǵan úkimet» memlekettik korporatsiiasynyń Almaty qalalyq filialynyń málimetinshe, olardyń 9 116-sy – ul, al 8 382-si – qyz bala, dep habarlaidy ult.kz.
Megapolistegi demografiialyq ósim turaqty qarqynmen jalǵasyp keledi. Mamandardyń aitýynsha, jańa týǵan náresteler sanynyń jyl saiyn artýy qaladaǵy tabiǵi ósimniń joǵary ekenin kórsetedi.
Biyl almatylyq ata-analar ul balalaryna kóbine Alan, Alihan jáne Muhammed esimderin qoiǵan. Al qyz balalar arasynda Ailin, Asylym jáne Tomiris esimderi eń tanymal atandy.
Qazirgi tańda balanyń týýyn tirkeý birneshe tásil arqyly júzege asyrylady. Sábi dúniege kelgennen keiin bir táýlik ishinde anasynyń telefon nómirine 1414-ten quttyqtaý SMS-habarlama jiberilip, qajetti málimetter suratylady. Osylaisha qyzmetti proaktivti formatta rásimdeýge bolady.
Sonymen qatar týý týraly kýálikti ekinshi deńgeili bankterdiń mobildi qosymshalary, elektrondyq úkimet portaly nemese Halyqqa qyzmet kórsetý ortalyqtary arqyly alýǵa múmkindik bar.
Memleket jańa týǵan nárestelerge birjolǵy járdemaqy tóleidi. Birinshi, ekinshi jáne úshinshi balaǵa 38 ailyq eseptik kórsetkish (AEK), al tórtinshi jáne odan keiingi balalarǵa 63 AEK kóleminde tólem qarastyrylǵan. Egizder, úshemder nemese tórtemder dúniege kelgen jaǵdaida járdemaqy ár balaǵa jeke taǵaiyndalady.
