7-8 jeltoqsan kúnderi boran men kóktaiǵaqtyń saldarynan tótenshe jaidailar boiynsha qyzmet respýblikalyq avtojoldarda 200-dei adamǵa kómek kórsetip, qar qursaýynda qalǵan 102 tehnikany shyǵardy, dep habarlaidy "Ult aqparat".
QR IIM Tótenshe jaǵdailar komiteti baspasóz qyzmetiniń habarlaýynsha, Aqmola, Qaraǵandy, Pavlodar jáne Batys Qazaqstan oblystarynda apatty-qutqarý jumystary júrgizildi. Oǵan qutqarý qyzmetinen bólek, jergilikti atqarýshy organdardyń, politsiianyń, «Qazavtojol» JShS-nyń ókilderi jumyldyryldy.
Máselen Aqmola oblysynda «Sýrgýt-Shymkent» baǵytyndaǵy «Setra» avtobýsyndaǵy 69 jolaýshy «Nur-Sultan-Petropavl» avtojoly ashylǵansha Kókshetaý qalasyndaǵy jylytý beketine ýaqytsha ornalastyryldy. Jalpy, bul kúnderi óńirde eskertýdi elemei jolǵa shyǵyp ketken kóptegen jolaýshyǵa kómek kórsetildi.
Nur-Sultan qalasynan 60 shaqyrymdai jerde «Nur-Sultan-Pavlodar» avtojolynda 50-60 shaqty kólik jolda qalǵan. Qoiandy men Prirechnoe eldi mekenderiniń arasynda turyp qalǵan mashinalardy qar qursaýynan shyǵarýǵa arnaiy tehnika jóneltildi. Adamdar aýyldardaǵy mektepterge, jol boiyndaǵy dámhanalar men arnaiy jylytý beketterine ornalastyryldy. Joldy qardan arshýǵa 10 tehnika jumyldyryldy.
Qoiandy eldi mekeninen Sofievkaǵa deiin 36 kólikten turatyn kolonany tártip saqshylary jetkizip saldy. Mamandardyń sózine qaraǵanda, eshkim zardap shekpegen, qutqarý jumysy aiaqtalǵan. Avtojoldar tazalanyp jatyr.
Qaraǵandy oblysyndaǵy «Almaty-Ekaterinbýrg» avtojolynda kóktaiǵaq saldarynan 20 shaqty jolaýshysy bar eki avtobýs joldan shyǵyp ketti. Jolaýshylar zardap shekpegen, súirep shyǵarylǵan kólikter jolyn jalǵady.
Pavlodar oblysynda Ekibastuz qalasynyń mańynda kóktaiǵaqtyń saldarynan 65 júk kóligi jolda qaldy. «Qazavtojol» JShS qum-tuz qospasyn tósegennen keiin ǵana kólikter jolǵa shyqty.
Al «Semei-Qaraǵandy» baǵytyndaǵy avtobýstyń 11 jolaýshysy respýblikalyq mańyzy bar joldardyń jabylýyna bailanysty Ekibastuzdaǵy orta mektepke, Jelezinka eldi mekeninde «Omby-Pavlodar» baǵytyndaǵy avtobýstyń 15 jolaýshysy jergilikti mektep-internatqa ýaqytsha ornalastyryldy. Tańerteń jol ashylǵannan keiin avtobýstar jolǵa shyqty.
Batys Qazaqstan oblysy Báiterek aýdanynda jolda qalǵan «Toyota Land Cruiser» avtokóligin qutqarýshylar qar qursaýynan alyp shyqty. Avtokólik salonynda 4 adam bolǵan, olar din aman.
Azamattyq qorǵanys qyzmetiniń mamandary qolaisyz aýa raiy týraly habarlama kelgen jaǵdaida alys jolǵa shyqpaýdy eskertedi.
