21-24 naýryz aralyǵynda qazaqstandyqtar 136 myńnan astam memlekettik qyzmetti onlain aldy, dep habarlaidy "Ult aqparat" QR Tsifrlyq damý, innovatsiialar jáne aeroǵarysh ónerkásibi ministrliginiń baspasóz qyzmetine silteme jasap.
Elektrondyq úkimettiń egov.kz portalynda el aýmaǵynda jyljymaityn múlik obektilerin anyqtaý jáne jyljymaityn múlkiniń bar nemese joq ekendigi týraly anyqtama eń kóp suranysqa ie boldy.
«Ótken 4 kún ishinde qazaqstandyqtar alǵan qyzmetterdiń 21 myńnan astamy atalǵan anyqtamalardyń enshisinde. Zeinetaqy jinaqtarynyń jai-kúii, sottylyǵynyń joqtyǵy týraly, narkologiialyq jáne psihonevrologiialyq uiymdardan beriletin anyqtamalar da jii suralady», - delingen baspasóz habarlamasynda.
Qazaqstandyqtar eGov mobile qosymshasyn da belsendi paidalanýda. Demalys kúnderi atalǵan qosymsha AppStore PlayMarket arqyly 14 myńnan asa ret júktelgen. Osy qosymshanyń kómegimen ótken 4 kún ishinde azamattar 67 myńǵa jýyq memlekettik qyzmet alǵan.
«Búginde memlekettik qyzmetterdiń 80%-y onlain qoljetimdi. Olardy azamattar elektrondyq úkimettiń egov.kz saity, eGov mobile qosymshasy, Telegram-daǵy egovkzbot2.0 arnasy, Facebook jáne VKontakte áleýmettik jelileri arqyly ala alady», - delingen habarlamada.
