Senbi jáne jeksenbi kúngi demalystarda Nur-Sultan qalasynda travmatologiialyq pýnktterge 60 adam júgindi. Onyń ishinde 29 bala kóktaiǵaq saldarynan jaraqat alǵan, dep habarlaidy "Ult aqparat".
Elorda ákimdiginiń málimetine sáikes, qalada 4 travmpýnkt pen emhanalardaǵy 20 travmatologiialyq kabinet kómek kórsetedi.
Atap aitqanda, №1 qalalyq aýrýhananyń tramvpýnkti Esil aýdanynyń turǵyndaryna qyzmet kórsetedi. Ortalyq jol aýrýhanasynyń jaraqat pýnkti – Saryarqa aýdanynyń turǵyndaryna arnalǵan. Al Travmatologiia jáne ortopediia ǵylymi-zertteý institýty Almaty jáne Baiqońyr aýdandaryna qyzmet kórsetedi. Bul rette, balalar úshin № 2 qalalyq balalar aýrýhanasynyń jaraqat pýnkti jumys isteidi.
Emhanalardyń jumys ýaqyty 08-den 20:00-ge deiin. Bul mekemelerdiń kómegine patsientter turǵylyqty jeri boiynsha júgine alady (anyqtamalyq aqparat «109» telefon nómiri arqyly).
