Demalys kúnderi respýblika boiynsha 64 adam qar qursaýynan qutqaryldy. Sondai-aq 37 tehnika evakýatsiialanǵan, dep habarlaidy QazAqparat.
23-24 qańtar kúnderi Almaty, Shyǵys Qazaqstan, Qaraǵandy, Qyzylorda, Túrkistanoblystaryndaǵy avtojoldarda qar qursaýynan 64 adam (onyń ishinde 8 bala) qutqaryldy, 37 jeńil jáne júk avtomashinasy shyǵaryldy.
Bul týraly QR TJM resmi ókili Talǵat Ýáli málimdedi.
Avariialyq-qutqarý jumystaryn júrgizýge TJ departamentteriniń, respýblikalyq jedel qutqarý jasaǵynyń, jergilikti atqarýshy organdardyń kúsh-quraldary jumyldyryldy.
Sonymen qatar, Almaty oblysynda 2 izdestirý-qutqarý jumystary júrgizilip, 3 adam qutqaryldy.
23 qańtar kúndiz Alakól aýdanynda Qabanbai aýylynan 50 shaqyrym jerde 1975 jyly týǵan adamdy izdestirý jumysy júrgizildi.
Ol 22 qańtarda «Kapsaliamova» sharýa qojalyǵyna «Gaz-53» avtokóligimen mal qaraýǵa shyǵyp, oralmaǵan.
Keshkisin ol «Kapsaliamova» ShQ aýmaǵynan tabylyp, Qabanbai aýylyna jetkizildi.
Sonymen qatar, 22 qańtar kúni keshke qutqarýshylar Aqsý aýdany Úlgili aýylynyń mańynda mal jaiyp júrip, joǵalyp ketken 1959 jyly týǵan baqtashyny izdedi.
23 qańtar kúni tańerteń aýyldan 8 shaqyrym jerden baqtashy tabylyp, qutqarylyp, «Ádilet» sharýa qojalyǵyna jetkizildi.
Jalpy, 2020-2021 jyldardaǵy qysqy maýsym bastalǵaly el turǵyndaryna «112» telefon nómirinen 2 040 SMS-habarlama, «Dármen» mobildi qosymshasy arqyly 678 habarlama jiberildi.
Elimizde 651 ret daýyldy eskertý jariialandy. Elimizdegi respýblikalyq mańyzy bar avtojoldar 28 ret jabylyp, 34 ret sheteý qoiyldy.
Alaida, osy eskertýlerge qaramastan, adamdar jolǵa shyǵyp, qar qursaýynda qalǵan jaǵdailar boldy.
Osylaisha, qar qursaýynan 204 adam, onyń ishinde 14 bala qutqaryldy. 186 adam, onyń ishinde 5 bala evakýatsiialandy.
Qutqarýshylar qar qursaýynan 57 avtokólikti shyǵardy.
Qajet bolǵan jaǵdaida ákimdikter qar qursaýynda qalǵan adamdar úshin jylytý pýnktilerin uiymdastyrady.
Budan basqa, qajet bolǵan jaǵdaida respýblikalyq mańyzy bar avtojoldarda ornalasqan Tótenshe jaǵdailar ministrliginiń 40 trassalyq meditsinalyq-qutqarý pýnktinde jylynýǵa bolady.
Qysqy maýsymda kólikpen alys jolǵa shyqpas buryn, mindetti túrde aýa raiy boljamyn qaraý qajet.
«Eger qatty boran bolsa, siz jol keptelisine túsip qalýyńyz múmkin. Tipti jol-kólik oqiǵasynada tap bolýyńyz yqtimal. Eger Sizge qandai da bir eldi mekenge shuǵyl barý qajet bolsa, mejeli jerge kedergisiz jetý úshin temir jol kóligin paidalanýdy usynamyz. Eger Siz osy qarapaiym nusqaýlardy oryndasańyz, bul boran kezinde jáne borannan keiin aman qalýǵa kómektesedi» dep eskertedi ministrlik.
