Tótenshe jaǵdailar komiteti eresekterdiń qaraýynsyz qalǵan balalardyń jaǵdaiyna qatysty oqiǵalarǵa alańdaýshylyq bildirýde, dep habarlaidy "Ult aqparat".
Sońǵy ailarda ata-analarynyń balalaryn dalada nemese úide qaraýsyz qaldyrǵan soń oryn alǵan qaiǵyly jaǵdailar sany kóbeiip ketken.
Ótken demalys kúnderi respýblikada balalarǵa qatysty 7 qaiǵyly oqiǵa bolǵan, sonyń saldarynan úsh bala qaza taýyp, beseýi aýrýhanaǵa jetkizildi.
22 tamyz túninde elordanyń «Esil» aýdanyndaǵy «Prigorodnoe» saiajai qoǵamyndaǵy turǵyn úide qatty otynmen janatyn peshtiń aqaýy, pesh murjasynyń tazartylmaýy saldarynan 2017 jáne 2012 jyly dúniege kelgen eki bala iis tiip, aýrýhanaǵa jetkizilgen.
22 tamyz kúni keshke Nur-Sultan qalasyndaǵy 14 qabatty kóppáterli turǵyn úide eresekterdiń qaraýynsyz qalǵan 2016 jylǵy qyz bala tórtinshi qabat terezesinen qulap, jaraqat alyp, aýrýhanaǵa jetkizildi.
Sol kúni Almaty oblysynyń Alakól aýdanyndaǵy Aqshi aýylynda Alakólge shomylyp júrgen 2012 jylǵy balany gidrotsikl qaǵyp ketip, jaraqat alyp, aýrýhanaǵa jetkizildi.
22 tamyz kúni Pavlodar oblysynyń Baianaýyl aýdanyndaǵy M.Júsip aýylyndaǵy jekemenshik turǵyn úide jeńil kólik órtendi. Sonyń saldarynan kúiik shalǵan 2018 jylǵy qyz bala aýrýhana jetkizilip, sol jerde qaitys boldy. Aldyn ala boljam boiynsha, órtke elektr symdarynyń tuiyqtalýy sebep bolǵan.
23 tamyzda Almaty qalasynyń Naýryzbai aýdanyndaǵy jekemenshik turǵyn úidiń aýlasynda 2010 jylǵy bala abaisyzda tereńdigi 4 metr jertólege túsip ketken. Ol aýrýhanaǵa jetkizildi.
23 tamyzda Batys Qazaqstan oblysy, Janǵaly aýdanynyń Jańaqazǵan kentindegi jekemenshik túrǵyn úidiń aýlasynda úlkenderdiń qaraýynsyz qalǵan 2016 jylǵy qyz bala tereńdigi 2,5 metr ashyq turǵan qudyqqa qulap, batyp ketti.
Sol kúni Mańǵystaý oblysynyń Jańaózen qalasyndaǵy jekemenshik turǵyn úidiń aýlasynda eresekterdiń qaraýynsyz qalǵan 2012 jylǵy bala qoldan jasalǵan átkenshek teýip júrip qaza tapty.
QR IIM Tótenshe jaǵdailar komiteti ata-analardy balalaryn qaraýsyz qaldyrmai, qarapaiym qaýipsizdik erejelerin saqtaýyn suraidy.
