تٶتەنشە جاعدايلار كوميتەتٸ ەرەسەكتەردٸڭ قاراۋىنسىز قالعان بالالاردىڭ جاعدايىنا قاتىستى وقيعالارعا الاڭداۋشىلىق بٸلدٸرۋدە, دەپ حابارلايدى "ۇلت اقپارات".
سوڭعى ايلاردا اتا-انالارىنىڭ بالالارىن دالادا نەمەسە ٷيدە قاراۋسىز قالدىرعان سوڭ ورىن العان قايعىلى جاعدايلار سانى كٶبەيٸپ كەتكەن.
ٶتكەن دەمالىس كٷندەرٸ رەسپۋبليكادا بالالارعا قاتىستى 7 قايعىلى وقيعا بولعان, سونىڭ سالدارىنان ٷش بالا قازا تاۋىپ, بەسەۋٸ اۋرۋحاناعا جەتكٸزٸلدٸ.
22 تامىز تٷنٸندە ەلوردانىڭ «ەسٸل» اۋدانىنداعى «پريگورودنوە» ساياجاي قوعامىنداعى تۇرعىن ٷيدە قاتتى وتىنمەن جاناتىن پەشتٸڭ اقاۋى, پەش مۇرجاسىنىڭ تازارتىلماۋى سالدارىنان 2017 جەنە 2012 جىلى دٷنيەگە كەلگەن ەكٸ بالا يٸس تيٸپ, اۋرۋحاناعا جەتكٸزٸلگەن.
22 تامىز كٷنٸ كەشكە نۇر-سۇلتان قالاسىنداعى 14 قاباتتى كٶپپەتەرلٸ تۇرعىن ٷيدە ەرەسەكتەردٸڭ قاراۋىنسىز قالعان 2016 جىلعى قىز بالا تٶرتٸنشٸ قابات تەرەزەسٸنەن قۇلاپ, جاراقات الىپ, اۋرۋحاناعا جەتكٸزٸلدٸ.
سول كٷنٸ الماتى وبلىسىنىڭ الاكٶل اۋدانىنداعى اقشي اۋىلىندا الاكٶلگە شومىلىپ جٷرگەن 2012 جىلعى بالانى گيدروتسيكل قاعىپ كەتٸپ, جاراقات الىپ, اۋرۋحاناعا جەتكٸزٸلدٸ.
22 تامىز كٷنٸ پاۆلودار وبلىسىنىڭ باياناۋىل اۋدانىنداعى م.جٷسٸپ اۋىلىنداعى جەكەمەنشٸك تۇرعىن ٷيدە جەڭٸل كٶلٸك ٶرتەندٸ. سونىڭ سالدارىنان كٷيٸك شالعان 2018 جىلعى قىز بالا اۋرۋحانا جەتكٸزٸلٸپ, سول جەردە قايتىس بولدى. الدىن الا بولجام بويىنشا, ٶرتكە ەلەكتر سىمدارىنىڭ تۇيىقتالۋى سەبەپ بولعان.
23 تامىزدا الماتى قالاسىنىڭ ناۋرىزباي اۋدانىنداعى جەكەمەنشٸك تۇرعىن ٷيدٸڭ اۋلاسىندا 2010 جىلعى بالا ابايسىزدا تەرەڭدٸگٸ 4 مەتر جەرتٶلەگە تٷسٸپ كەتكەن. ول اۋرۋحاناعا جەتكٸزٸلدٸ.
23 تامىزدا باتىس قازاقستان وبلىسى, جانعالى اۋدانىنىڭ جاڭاقازعان كەنتٸندەگٸ جەكەمەنشٸك تٷرعىن ٷيدٸڭ اۋلاسىندا ٷلكەندەردٸڭ قاراۋىنسىز قالعان 2016 جىلعى قىز بالا تەرەڭدٸگٸ 2,5 مەتر اشىق تۇرعان قۇدىققا قۇلاپ, باتىپ كەتتٸ.
سول كٷنٸ ماڭعىستاۋ وبلىسىنىڭ جاڭاٶزەن قالاسىنداعى جەكەمەنشٸك تۇرعىن ٷيدٸڭ اۋلاسىندا ەرەسەكتەردٸڭ قاراۋىنسىز قالعان 2012 جىلعى بالا قولدان جاسالعان ەتكەنشەك تەۋٸپ جٷرٸپ قازا تاپتى.
قر ٸٸم تٶتەنشە جاعدايلار كوميتەتٸ اتا-انالاردى بالالارىن قاراۋسىز قالدىرماي, قاراپايىم قاۋٸپسٸزدٸك ەرەجەلەرٸن ساقتاۋىن سۇرايدى.
