Densaýlyq saqtaý ministri Eljan Birtanov álem memleketteriniń kóshbasshylary sóz sóilegen onlain formattaǵy Dúniejúzilik densaýlyq saqtaý uiymynyń 73-shi sessiiasyna qatysty, dep habarlaidy "Ult aqparat".
«Álemdegi koronavirýs pandemiiasy men qazirgi epidemiologiialyq jaǵdaiǵa bailanysty Dúniejúzilik densaýlyq saqtaý uiymynyń otyrysy onlain rejimde ótýde. Bul joly kún tártibinde tek bir másele bar - COVID-19 indetine jahandyq turǵyda jaýap berý.
Assambleianyń kún tártibiniń ekinshi bóligi 2020 jyldyń keiingi kezeńine aýystyryldy. Onda alǵashqy meditsinalyq-sanitarlyq kómek týraly Astana deklaratsiiasyn jahandyq deńgeide iske asyrý jospary týraly sheshim qabyldanatyn bolady. Ótken jyly Dúniejúzilik densaýlyq saqtaý assambleiasynyń 72-sessiiasynda alǵashqy meditsinalyq-sanitarlyq kómek týraly rezoliýtsiia biraýyzdan qabyldanǵanyn, onda memleketter Astana deklaratsiiasyna sáikes alǵashqy meditsinalyq-sanitarlyq kómekti kúsheitýge shaqyrylǵanyn eske sala keteiin», - dep jazdy Eljan Birtanov Feisbýktegi paraqshasynda.
Ministr otyrystyń ashylý saltanatynda Shveitsariia Prezidenti Simonetta Somarýga, BUU Bas hatshysy Antoniý Gýterrish, Qytai Halyq Respýblikasynyń Tóraǵasy Si Tszinpin, Frantsiia Prezidenti Emmanýel Makron, Ońtústik Koreia Prezidenti Mýn Chje In, Germaniianyń kantsleri Angela Merkel sóz sóilegenin aityp ótti. Sonymen qatar otyrysty Ońtústik Afrika Respýblikasynyń basshysy Siril Ramafosa, Barbados Premer-Ministri Mia Mottli jáne Dúniejúzilik densaýlyq saqtaý uiymynyń bas direktory, Tedros Adhanom Gebreiýs sóz alǵan.
«Antonio Gýterrish Dúniejúzilik densaýlyq saqtaý uiymynyń jetekshiligimen búkil álemde koronavirýspen kúresý úshin kelisilgen kúsh-jigerdiń mańyzdylyǵyn atap ótti.
«Búkil álem birigedi nemese jeńiledi» dedi BUU Bas hatshysy. Si Tszinpin óz sózinde álemdik qaýymdastyqqa birneshe usynys aitty. Mysaly Dúniejúzilik densaýlyq saqtaý uiymy koronavirýsqa qarsy kúresti basqarýy kerektigin atap ótti. Osyǵan bailanysty Qytai memleketterdi atalmysh uiymdy saiasi jáne qarjylyq jaǵynan qoldaýǵa shaqyrady. Halyqaralyq yntymaqtastyqty nyǵaitý - ótken sabaqtardyń umytylmaýyn qamtamasyz etýdiń kepili. Sondai-aq, Qytai basshysy vaktsina jasalǵannan keiin ony álemmen bólisýge jáne ony qoǵamǵa paidaly etýge daiyn ekendikterin aitty.
Emmanýel Makron bolsa DDSU-nyń koronavirýspen kúrestegi jetekshi róliniń mańyzdylyǵyn jáne uiymdy Frantsiiadan qarjylandyrý kóleminiń edáýir arttyrylǵanyn jetkizdi. Angela Merkel álemdegi birde-bir memleket japadan jalǵyz koronavirýs problemasyn jeńe almaitynyn málimdedi. Germaniia kantsleri DDSU densaýlyq saqtaýdyń jahandyq problemalaryn sheshetin zańdy uiym ekenin eske saldy», - dep jazady ministr.
Otyrystyń qorytyndysynda Tedros Gebreiesýs COVID-19 dertine qarsy búkil álem elderin birigýge shaqyrdy. Onyń aitýynsha, serologiialyq zertteýler óte aiqyn kórinisti berip otyr. Koronavirýstan aýyr zardap shekken elderde qandaǵy antidene bar halyqtyń úlesi 20 paiyzdan az. Al kóptegen elde ol 10 paiyzdan da tómen. Bul álem halqynyń kópshiligi osy virýsqa áli de shaldyǵýy múmkin ekenin bildiredi.
«Sondyqtan, taǵy bir ret eske salamyn: qazirgi ýaqytta bizdiń turǵyndar úshin barlyq qaýipsizdik sharalary - áleýmettik qashyqtyq jáne jeke gigiena erejelerin saqtaý óte mańyzdy», - dep túidi ministr.
Otyrysta Qazaqstan delegatsiiasynyń málimdemesi búgin túnde jariialanady.
