Dúniejúzilik densaýlyq saqtaý uiymy (DDSU) koronavirýsqa qarsy AstraZeneca vaktsinasyn paidalana berýge keńes berdi. Uiym ókilderi onyń paidasy yqtimal qaýipten molyraq ekenin aitty.
Ótken aptadan beri kóptegen elder "vaktsina trombylardyń túzilýine áser etedi" degen habarlamaǵa alańdap, saqtyq maqsatynda ony egýdi toqtatqan.
Bir kún buryn Eýropanyń dári-dármek jónindegi agenttigi vaktsina men qan ainalymynyń nasharlaýy arasynda bailanys taba almaǵanyn habarlaǵan. AstraZeneca kompaniiasy da preparattyń qaýipsiz ekenin aityp otyr.
Eýroodaqta vaktsina egilgen 5 mln adamnyń ishinde keminde 30 adamnan trombylardyń túzilýi anyqtalǵan.
Ulybritaniia premer-ministr Boris Djonson AstraZeneca vaktsinasyna senimdi arttyrý maqsatynda ózine de osy vaktsinany saldyrtatynyn aitty. Ulybritaniia atalǵan vaktsinanyń 11 mln dozasyn úlestirip qoiǵan jáne jergilikti sarapshylar vaktsina egilgender arasynda trombylardyń túzilýine jii shaǵymdanýshylar joq ekenin aitady.
AstraZeneca vaktsinasynan ýaqytsha bas tartý Eýropada onsyz da baiaý júrip jatqan koronavirýsqa qarsy vaktsinalaý kampaniiasyn tejep otyr. Al densaýlyq saqtaý salasynyń mamandary indettiń úshinshi tolqyny jaily aita bastaǵan.
17 naýryzda Briýssel ekpe men koronavirýs testiniń qorytyndysy jaily málimetter bar elektrondy sertifikat júiesin engizgenin de habarlady. Bul jazda týristik maýsym kezinde Eýroodaq aýmaǵynda saparlaýdy jeńildetýi tiis.
Eýrokomissiia ókilderiniń aitýynsha, EO-ǵa múshe elderdiń birinde vaktsina alǵan "jasyl sertifikaty" bar kez kelgen adam odaq aýmaǵynda koronavirýstan qorǵalǵanyn dáleldei alady.
Mundai sertifikat-pasporttar maýsym aiynyń basynan bastap engizile bastaidy. Derekter QR-kod arqyly tekseriledi. Ony qaǵaz nemese elektrondy túrde de paidalana berýge bolady dep aitylady.
