Dúniejúzilik densaýlyq saqtaý uiymynyń (DDSU) arnaiy toby reseilik «Spýtnik V» vaktsinasyn sertifikattaý aiasynda, preparat týraly derekterdi zertteý maqsatymen Reseide júr. Sapar sońynda esep daiyndalady. Bul týraly TASS agenttigine bergen suhbatynda DDSU Eýropalyq óńirlik biýrosynyń direktory Hans Kliýge málim etti, dep habarlaidy "Ult aqparat".
«Men áý-bastan reseilik bilikpen bailanystamyn. Sebebi bizdiń aldymyzda vaktsinany maquldaý mindeti tur. Dál qazir bizdiń mamandar RF-da, olardyń missiiasy 4 maýsym kúni aiaqtalady. Sol kezde usynystar qamtylǵan esep daiyn bolady», - dedi ol.
Kliýgeniń aitýy boiynsha, «Spýtnik V» vaktsinasyn sertifikattaýǵa qatysty «optimizmge negiz bar». «Eýropalyq dári-dármek agenttigi de, DDSU da vaktsinany zertteýde. Óz aldyna munyń ózi – jaqsy belgi», - dep qosty ol.
Sonymen qatar Hans Kliýge halyqty birden birneshe vaktsinamen qamtamasyz etý boiynsha reseilik biliktiń jumysyn joǵary baǵalady.
«RF-da qazirgi kezde birneshe vaktsina qoljetimdi. Degenmen bizge halyqtyń neǵurlym kóp vaktsinalanǵany kerek. Osylaisha, bizge ekpe alǵan azamattardyń úlesin arttyrý qajet», - dedi ol.
Onyń aitýynsha, «ujymdyq immýnitet qalyptastyrý úshin halyqtyń kem degende 70% vaktsina alýy kerek». «Belgili bir naqty sandar joq, degenmen vaktsinalaý jyldamyraq jáne aýqymdyraq júrýi tiis», - dep qosty Kliýge.
Bul oraida ol Eýropadaǵy jaǵdaidy úlgi etti. «Qazirgi kezde DDSU-nyń Eýropalyq óńirinde halyqtyń 26% kem degende vaktsinanyń bir dozasyn aldy. Bul – jaqsy jańalyq, - dedi ol. – Alaida qarqyn budan edáýir joǵary bolýy shart. Sol kezde biz senimdi bolamyz. Sol sebepti bul jaǵdaida jyldamdyq – bizdiń jaqyn dosymyz».
Eýropalyq dári-dármek agenttigi 4 naýryz kúni «Spýtnik V» vaktsinasyna birizdi saraptama jasaý protsedýrasynyń bastalǵany týraly habarlady. Qazirgi kezde reseilik preparattyń tirkelýi aiaqtalǵan joq.
«Spýtnik V» reseilik vaktsinasy ortaq halqy 1,5 mlrd adamnan asatyn 60 eldiń rettegishterimen tirkelgen. 30-dan astam el atalmysh vaktsinamen jappai vaktsinalaýdy bastap ketken. Onyń 91,6% deńgeiindegi tiimdiligi The Lancet jetekshi meditsinalyq jýrnalyndaǵy jariialanymmen rastalǵan.
