Dúniejúzilik densaýlyq saqtaý uiymy (DDSU) 13 tamyzda álemdegi qyzylsha derti jaily jarty jyldyq esebin jariialady. Uiym dereginshe, bul dert ásirese Qazaqstan, Angola, Kamerýn, Chad, Nigeriia, Filippin, Ońtústik Sýdan jáne Tailandta órship tur.
DDSU-nyń habarlaýynsha, 2019 jyldyń alǵashqy jartysynda ótken jylǵy osyndai kezeńmen salystyrǵanda qyzylshamen aýyrǵan adam sany úsh ese kóbeiip, 2006 jyldan beri bolmaǵan rekordtyq kórsetkishke jetken. Halyqaralyq uiymnyń esebi boiynsha, ótken alty aida álemde qyzylshamen aýyrǵandar sany 364 myńnan asqan. DDSU ókilderi áli esep bermegen elder bar bolǵandyqtan, bul álem boiynsha qyzylsha derti jaily tolyq málimet emes deidi.
2018 jyly álemde qyzylsha dertine shaldyqqan 353 myń adam tirkelgen.
DDSU esebinde Afrika qurylyǵynda qyzylshamen aýyrǵan adam sany on ese kóbeiip, óte kúrdeli jaǵdai qalyptasyp otyrǵany aitylǵan. Eýropada qyzylsha dertimen aýyrǵandar sany ótken jylǵymen salystyrǵanda eki ese kóbeigen.
DDSU-nyń biyl sáýirde jariialaǵan esebi boiynsha, 2019 jyldyń alǵashqy úsh aiynda qyzylshamen aýyrǵan 3414 adam tirkelgen Qazaqstan osy dert kórsetkishi boiynsha álemde besinshi orynda turǵan.
Qyzylsha - virýspen taraityn juqpaly aýrý. Ony juqtyrǵan adamnyń qyzýy kóterilip, tynys alýy qiyndaidy, kózi qyzaryp, denesi qyzara bórtip ketedi. Dúniejúzilik densaýlyq saqtaý uiymy derttiń órshýine arnaiy vaktsina egýden bas tartý sebep bolýy múmkin dep eskertedi.
