Dúniejúzilik densaýlyq saqtaý uiymy Eýropada pandemiianyń órship bara jatqanyn málim etti, dep habarlaidy reseilik TASS agenttigi.
Agenttiktiń habarlaýynsha, Eýropada kúnine koronavirýs juqtyrýdyń 20 myń jaǵdaiy tirkelip otyr. Sondai-aq kúnine osy indetten 700 adam qaitys bolady.
Virýs juqtyrǵandar sanynyń ósýi sońǵy birneshe aida baiqalǵan. Bul týraly beisenbi kúni Dúniejúzlik densaýlyq saqtaý uiymynyń Eýropalyq óńirlik biýrosynyń direktory Hans Kliýge Kopengagende ótken brifingte málimdegen.
«Biraz ýaqyt buryn Eýropa óńirinde jyl basymen salystyrǵanda aýrý juqtyrý jaǵdailary úlesiniń azaiǵany týraly habarlanǵan edi. Soǵan qaramastan óńirde kún saiyn 20 000-ǵa jýyq koronavirýs juqtyrý jaǵdaiy tirkelip, osy indettiń saldarynan qaitys bolǵandar sany kúnine 700 adamdy quraǵan. Ótken aptada Eýropada birneshe aidan beri alǵash ret apta saiynǵy aýrý juqtyrý jaǵdailary sanynyń ósýi baiqaldy», – dep atap ótti Kliýge.
Ol koronavirýs juqtyrǵan jańa jaǵdailar sany sońǵy eki aptada 30 elde artqanyn aitty. Olardyń 11-inde aýrýdyń kúrt ósýi baiqalǵan. Sonymen qatar Polsha, Germaniia, Ispaniia jáne Izrailde bilik COVID-19 juqtyrǵan jańa jaǵdailardyń kóbeiýine den qoiyp, jyldam áreket etti.
