10 shilde Dúniejúzilik densaýlyq saqtaý uiymynyń (DDSU) koronavirýs juqtyrǵandardyń táýliktik ósimi boiynsha rekordtyq kórsetkish tirkelgenin málimdedi. Koronavirýs infektsiiasyn (KVI) juqtyrǵandardyń basym bóligi Soltústik jáne Ońtústik Amerika elderiniń, Úndistannyń jáne Ońtústik Afrika Respýblikasynyń úlesinde.
Keiingi táýlikte álem boiynsha 228 102 adamnan KVI anyqtalǵan. Álemde barlyǵy 12,4 adamnyń KVI juqtyrǵany rastalǵan. Keiingi alty aptada COVID-19 infektsiiasyn juqtyrǵandar sany eki ese ósken. Qaitys bolǵandar 560 myń adamnan asty.
DDSU basshysy Tedros Adhanom Gebreiesýs Italiia, Ispaniia jáne Ońtústik Koreia siiaqty elderdiń mysaldary agressivti sharalar indettiń taraýyn shekteýde tiimdi ekenin kórsetti dedi.
AQSh-tyń ońtústigi men batysynda indet úlken qarqynmen tarap otyr. Elde apta boiy kún saiyn 60 myńdai adamnyń KVI juqtyrǵany anyqtalyp jatyr. Jergilikti bilik turǵyndardan jabyq esik jaǵdaiyndaǵy qoǵamdyq oryndarda jáne kóp adam jinalatyn ashyq esik jaǵdaiyndaǵy oryndarda maska taǵýdy talap etti. AQSh úkimeti súienip otyrǵan Vashington ýniversitetiniń boljamynsha, qoǵamdyq orynda ámbebap maska taǵyp júrý virýstyń taraýyn 80 paiyzǵa, ólim deńgeiin 60 paiyzǵa azaitýy múmkin.
AQSh-taǵy Djons Hopkins ýniversitetiniń dereginshe, Qazaqstan KVI juqtyrǵandar boiynsha álem elderi arasynda 31-orynda. Qazaqstan biliginiń resmi deregine sáikes, elde 56 455 adamnyń KVI juqtyrǵany rastalǵan. Densaýlyq saqtaý ministrligi virýs juqtyrǵandar sany budan kóp bolýy múmkin ekenin moiyndady. Keiingi kúnderi kóptegen qazaqstandyq koronavirýstyń bar-joǵyn anyqtaityn taldaýdy jasata almai otyrǵanyna (jekemenshik zerthanalar analiz alýdy toqtatty), aýrýhanada oryn jetpei naýqastardy qabyldamai jatqanyna, dárihanalardaǵy dári tapshylyǵyna shaǵyndy.
