G7 sammiti ótip jatqan Kornýoll graftyǵyndaǵy narazylyq aktsiiasy. Ulybritaniia, 12 maýsym 2021 jyl.
Dúniejúzilik densaýlyq saqtaý uiymynyń basshysy Tedros Adhanom Gebreiesýs G7 sammiti aiasynda koronavirýs infektsiiasy zerthanadan tarady degen nusqany joqqa shyǵarýǵa bolmaidy dep, Qytaidy "ashyqtyq tanytpai otyrǵany" úshin aiyptady.
Pandemiia bastalǵaly álemde 175 million adamnyń osy virýsty juqtyrǵany rastaldy. Onyń 3,7 milliony kóz jumdy. Gebreiesýs virýstyń qaidan taraǵanyn anyqtaý osy adamdarǵa qurmet kórsetýmen teń deidi. Ol sondai-aq muny bilý osyǵan uqsas indettiń aldyn alý úshin de mańyzdy ekenin atap ótti.
"Árbir boljam ashyq bolýy tiis" dedi Gebreiesýs virýs zerthanadan shyqqan bolýy múmkin degen boljam týraly suraqqa jaýap bere otyryp.
DDSU basshysy zertteýdiń basynda Qytai qajetti deńgeide "ashyqtyq pen áriptestik" tanytpady dedi.
Munyń aldynda AQSh prezidenti Djo Baiden amerikalyq barlaý qyzmetterine Covid-19 virýsynyń shyǵý tegin anyqtaýdy tapsyryp, 90 kún ishinde nátijesin aitýdy buiyrdy.
New York Times basylymy AQSh ákimshiligindegi laýazymdy qyzmetkerlerge siltei otyryp, amerikalyq barlaý qyzmetinde koronavirýs pandemiiasyna bailanysty áli zerttelmegen málimetterdiń baryn, bul týraly Aq úige habarlanǵanyn jazdy. Barlaý qyzmeti virýstyń qalai taraǵanyn bilý úshin qýatty kompiýterlerdi paidalanbaq.
Mamyrda Qytaidyń AQSh-taǵy elshiligi bul tergeýdi synǵa alyp, ony "Qytaidy aiyptaý úshin jasap otyr" dedi.
Osyǵan deiin DDSU sarapshylarynan turatyn top Ýhan qalasynaǵy virýsologiia institýtyna barǵan. Bul sapardyń nátijesinde virýstyń institýt zerthanasynan taraýy "ekitalai" degen qorytyndy shyǵaryldy. Alaida Ulybritaniia men AQSh bul málimdemege kúdikpen qarap, Qytaidy sarapshylarǵa qajet málimetti bermedi dep aiyptady.
