G7 سامميتٸ ٶتٸپ جاتقان كورنۋولل گرافتىعىنداعى نارازىلىق اكتسيياسى. ۇلىبريتانييا, 12 ماۋسىم 2021 جىل.
دٷنيەجٷزٸلٸك دەنساۋلىق ساقتاۋ ۇيىمىنىڭ باسشىسى تەدروس ادحانوم گەبرەيەسۋس G7 سامميتٸ اياسىندا كوروناۆيرۋس ينفەكتسيياسى زەرتحانادان تارادى دەگەن نۇسقانى جوققا شىعارۋعا بولمايدى دەپ, قىتايدى "اشىقتىق تانىتپاي وتىرعانى" ٷشٸن ايىپتادى.
پاندەمييا باستالعالى ەلەمدە 175 ميلليون ادامنىڭ وسى ۆيرۋستى جۇقتىرعانى راستالدى. ونىڭ 3,7 ميلليونى كٶز جۇمدى. گەبرەيەسۋس ۆيرۋستىڭ قايدان تاراعانىن انىقتاۋ وسى ادامدارعا قۇرمەت كٶرسەتۋمەن تەڭ دەيدٸ. ول سونداي-اق مۇنى بٸلۋ وسىعان ۇقساس ٸندەتتٸڭ الدىن الۋ ٷشٸن دە ماڭىزدى ەكەنٸن اتاپ ٶتتٸ.
"ەربٸر بولجام اشىق بولۋى تيٸس" دەدٸ گەبرەيەسۋس ۆيرۋس زەرتحانادان شىققان بولۋى مٷمكٸن دەگەن بولجام تۋرالى سۇراققا جاۋاپ بەرە وتىرىپ.
ددسۇ باسشىسى زەرتتەۋدٸڭ باسىندا قىتاي قاجەتتٸ دەڭگەيدە "اشىقتىق پەن ەرٸپتەستٸك" تانىتپادى دەدٸ.
مۇنىڭ الدىندا اقش پرەزيدەنتٸ دجو بايدەن امەريكالىق بارلاۋ قىزمەتتەرٸنە Covid-19 ۆيرۋسىنىڭ شىعۋ تەگٸن انىقتاۋدى تاپسىرىپ, 90 كٷن ٸشٸندە نەتيجەسٸن ايتۋدى بۇيىردى.
New York Times باسىلىمى اقش ەكٸمشٸلٸگٸندەگٸ لاۋازىمدى قىزمەتكەرلەرگە سٸلتەي وتىرىپ, امەريكالىق بارلاۋ قىزمەتٸندە كوروناۆيرۋس پاندەميياسىنا بايلانىستى ەلٸ زەرتتەلمەگەن مەلٸمەتتەردٸڭ بارىن, بۇل تۋرالى اق ٷيگە حابارلانعانىن جازدى. بارلاۋ قىزمەتٸ ۆيرۋستىڭ قالاي تاراعانىن بٸلۋ ٷشٸن قۋاتتى كومپيۋتەرلەردٸ پايدالانباق.
مامىردا قىتايدىڭ اقش-تاعى ەلشٸلٸگٸ بۇل تەرگەۋدٸ سىنعا الىپ, ونى "قىتايدى ايىپتاۋ ٷشٸن جاساپ وتىر" دەدٸ.
وسىعان دەيٸن ددسۇ ساراپشىلارىنان تۇراتىن توپ ۋحان قالاسىناعى ۆيرۋسولوگييا ينستيتۋتىنا بارعان. بۇل ساپاردىڭ نەتيجەسٸندە ۆيرۋستىڭ ينستيتۋت زەرتحاناسىنان تاراۋى "ەكٸتالاي" دەگەن قورىتىندى شىعارىلدى. الايدا ۇلىبريتانييا مەن اقش بۇل مەلٸمدەمەگە كٷدٸكپەن قاراپ, قىتايدى ساراپشىلارعا قاجەت مەلٸمەتتٸ بەرمەدٸ دەپ ايىپتادى.
