Dúniejúzilik densaýlyq saqtaý uiymy (DDSU) densaýlyq saqtaý ministrleri deńgeiinde álem elderiniń koronavirýs infektsiiasymen kúres sharalaryn zertteý týraly rezoliýtsiiany qoldady.
Rezoliýtsiia jobasyn Eýroodaq usynǵan, ony júzden astam el qoldady. Arasynda Resei men Qytai da bar. Eshbir el qarsy bolǵan joq.
Qujatta indettiń taraýyna halyqaralyq reaktsiiany "táýelsiz ári jan-jaqty" zertteý qajettigi týraly aitylǵan. Alaida virýstyń paida bolýyn zertteý qajettigi aitylmaǵan jáne virýs alǵash paida bolǵan memleket - Qytai týraly da sóz joq.
DDSU uiymynyń jiyny videokonferentsiia formatynda ótken. BUU bas hatshysy Antonio Gýterrish pandemiiany qazirgi zamannyń eń kúrdeli máselesi dep atady jáne ázirge oǵan qarsy turatyn tiimdi qural tabylmaǵanyn atap ótti. Gýterrishtiń sózine qaraǵanda "túrli elder virýspen árqalai kúresip jatyr jáne keide daýly strategiialar qoldanady".
DDSU-nyń jumysyn AQSh prezidenti Donald Tramp ótkir synaǵan. Vashington Pekin epidemiianyń shynaiy taraý aýqymyn jasyrdy dep sanaidy. Amerika biliginiń oiynsha, DDSU Pekinnen túsken aqparatqa sendi jáne indettiń qaýpin durys baǵalai almady dep esepteidi.
Seisenbi kúni Tramp DDSU-ny 30 kún ishinde "jumysyn jaqsartýǵa shaqyrdy". Tramptyń aitýynsha, eger uiym qandai da bir nátije shyǵarmasa, AQSh bul uiymǵa múshe bolý-bolmaý máselesin de qaita qarastyrýy múmkin jáne qarjylandyrýdy múlde toqtatýy yqtimal.
Sońǵy aqparat boiynsha, álemde 5 millionǵa jýyq adamǵa virýs juqqan. 320 myńnan astam adam qaitys bolǵan.
