Eýropa men Ortalyq Aziia ekonomikasy 2008 jyldan beri bolyp kórmegen retsessiiaǵa qarai jyljyp barady. Dúniejúzilik bank jariialaǵan málimdemede biyl aimaq ekonomikasynyń 4,4 paiyzǵa qysqaratyny jazylǵan. Dúniejúzilik bank kelesi jyly aimaq ekonomikasy 1,1 men 3,3 paiyz aralyǵynda damidy dep sanaidy.
"Mundai kúrdeli shaqta Eýropa jáne Ortalyq Aziia elderi daǵdarysty eńserip, indetten keiin ekonomikany qalypqa keltirýge qamdanýy tiis. Iaǵni, basqarý sapasyn jetildirip, investitsiialyq klimatty jaqsartýǵa kúsh salýy kerek, innovatsiia men tsifrlyq damý kómegine júginýi tiis. Ásirese sapaly bilim men densaýlyq saqtaý salasyna turaqty túrde aitarlyqtai investitsiia quiý mańyzdy" dedi Dúniejúzilik banktiń Eýropa jáne Ortalyq Aziia aimaǵy boiynsha vitse-prezidenti Anna Berde.
Dúniejúzilik bank indettiń kesirinen ekonomikanyń quldyraýy aimaqta kedeiler sanynyń artýyna áser etedi dep sanaidy. Eger 3,2 dollarǵa kún kóretin adamdardy kedeiler qataryna qossa, kelesi jyly kedeiler sany 2,2 million adamǵa artady. Al eger 5,5 dollarǵa kún kóretin adamdar kedei dep sanalsa, bul kórsetkish 6 millionǵa deiin jetýi múmkin.
Dúniejúzilik bank indet aimaqtaǵy bilim men densaýlyq saqtaý salasyna da keri áser etti dep sanaidy.
"Jyldam ózgeriske ushyraityn eńbek naryǵynda adamdardyń básekege qabilettiligin saqtaý úshin sapaly joǵary bilimge kóp kóńil bólý kerek. Batys Balqan, Shyǵys Eýropa, Ońtústik Kavkaz jáne Ortalyq Aziia elderindegi joǵary bilim sapasyn jetildirý de kóshi-qon turaqty túrde artqan shaqta bilikti mamandardy saqtaýǵa kómektesedi" delingen málimdemede.
