AQSh-tyń Djordjiia shtatynda daýystardy qaita tolyq sanap shyqqannan keiin ol jaqta demokrat Djo Baidenniń jeńiske jetkeni rastaldy. Shtattyń memlekettik hatshysy Bred Raffensperger shtat "Baidenniń jeńiske jetkenine kýálik beredi" dedi.
“Aýdit qorytyndysynyń sailaý ótken túni taratylǵan aqparattan aiyrmashylyǵy óte az” dedi 19 qarashada Raffensperger jergilikti WSB-TV arnasyna bergen suhbatynda.
Djordjiia shtatynda aldyn ala málimet Baidenniń Tramptan óte az aiyrmashylyqpen (14 myń daýys) alda kele jatqanyn kórsetkendikten, shtat zańy boiynsha mundai jaǵdaida shamamen 5 million biýlleten qolmen sanalaýy tiis.
7 qarashada Baiden sailaýshylar alqasynyń 270-ten astam daýysyn alǵannan keiin aqparat quraldary ony sailaý jeńimpazy retinde atai bastaǵan.
Djordjiia shtatynda jeńip, sailaýshylar alqasynyń 16 daýysyn alǵan Baiden 306 daýyspen Trampty (232 daýys) jeńip otyr.
Djordjiiada alǵa ozý - demokrattar úshin iri jeńis. Munda Bill Klinton kezeńinen beri demokrattardyń birde-bir kandidaty jeńbegen.
Sarapshylardyń aitýynsha, bul jeńis 5 qańtarda ótetin senat sailaýynyń ekinshi týry kezinde demokrattarǵa serpin berýi tiis. Osyǵan deiin Djordjiiadaǵy senat sailaýynda kandidattardyń eshqaisysy 50 paiyzdan artyq daýys jinai almaǵan edi. Qazir demokrattar senattaǵy 48 orynǵa ie. Qalǵan eki orynǵa kim otyratynyn 5 qańtar kúngi sailaý anyqtaidy.
