Búgin Aqtóbede quiyndy daýyl qurylys krandaryn qulatyp, saldarynan úsh páterdiń balkondary qirady. Qazirgi ýaqytta qurylys kompaniiasy shyǵyndy eseptep, qulaǵan krandy bólshektep jatyr, dep habarlaidy «QazAqparat» tilshisi.
Aqtóbedegi daýyl basy-aiaǵy 5 minýtqa sozylǵanymen Batys-2 aýdanyndaǵy turǵyn úidiń birneshe páteriniń balkonyn qiratyp ketti. Tabiǵattyń tosyn minezinen zardap shekkenderdiń biri - toǵyz qabatty úidiń segizinshi qabatynda turatyn Amangeldi Joldybaev. Páter ieleri úreilerin áli basa almai otyr, páterge túski 12:30-dan keiin eshkim kirmegen.
«Úide eki bala boldy. Ekeýi de mektep oqýshysy. Olar daýyl kezinde terezelerdi jaýyp, bólme ishinde otyrǵan. Óte qorqynyshty. Bul jerde qurylys erejeleri saqtalmaǵan. Kran eski, temiri shirip tur. Negizinen kran jerge myqty bekitilýi kerek. Buǵan deiin de kran jel soqqan saiyn shaiqalyp, qaýip tóndirip turdy. Búgingi qatty daýylǵa shydas bermedi. Krannyń neshe metr ekenin bilmeiiz. Qurylys kompaniiasynan pasportyn surap qoidym. Olardyń eshqaisysy shyqpai qaldy. Qazir tek jumysshylary krandy dánekerlep jatyr»,- dedi Amangeldi Joldybaev.
Bul otbasy úsh bólmeli páterdi nesiege rásimdegen. Ai saiyn 100 myń teńge kóleminde ipoteka tóleidi.
«Men ondaǵan jyl boiy kran aidaǵan adammyn. Kran shirip turǵan. Sondyqtan aryz túsirip, qazir ólshem jumystaryn júrgizip jatyrmyz. Beinetaspaǵa túsirip, sýretterdi saqtap qoidyq. Sotqa shaǵymdanamyz. Sebebi, kran qulaǵan kezde 7 metrlik balkonnyń betony qiraǵan. Ol qiraǵan kezde úidiń qabyrǵalarynda jaryq paida boldy», - dedi turǵyn Amangeldi Joldybaev.
Al birinshi qabatta turatyn Ásiia Jumasheva úsh minýtta úiiniń terezesi qirap, aýla syrtynda turǵan kóligine armatýra kirip ketkenin aitty.
«Qatty daýyl turǵan kezde joǵarydaǵy balkon qulap, betonnyń bir bóligi terezeni syndyryp ketti. Eki salqyndatqyshym isten shyqty. Kóligimizdi temir tesip ketip, áinegi shytynady. Qurylys kompaniiasynyń adamdary kelip, áinekti ólshep ketti. Biz shyǵyndy tolyq óteýdi talap etemiz», - deidi ol.
Aita keteiik, daýyl kezinde Qobylandy batyr atyndaǵy ortalyq stadionnyń shatyry búlindi, 6 kólik zaqymdandy.
«Úilerdiń aýlasynda turǵan 6 kólik zaqymdandy. Qobylandy batyr atyndaǵy ortalyq stadion tribýnasynyń shatyry ishinara ushyp ketti. Aýmaǵy - 34 sharshy metr. Shatyr ushyp, stadion janyndaǵy áinekten jasalǵan jazǵy demalys ornyn syndyryp ketti. Zardap shekkender men aýrýhanaǵa túskender joq», - dedi Aqtóbe oblystyq TJD baspasóz qyzmetkeri Dinara Atraýbaeva.
Buǵan deiin habarlaǵanymyzdai, Aqtóbedegi qatty daýyl kezinde birneshe úidiń shatyry ushyp, 9 qabatty úidiń balkondary qiraǵan bolatyn.
«Páteri zaqymdanǵan adamdar birigip, zańger jaldadyq. Olar sotta bizdiń quqyǵymyzdy qorǵaidy. Tótenshe jaǵdailar qyzmeti kelip, tekserip ketti. Balkonǵa shyǵýǵa tyiym saldy. Men daýyl kezinde balkonda júrip, kiim ilip jattym. Sol kezde qatty jel soǵyp, qoryqqanymnan bir orynda turyp, basymdy ustap, aiqailadym. Keiin esimdi jiyp, balalardy syrtqa alyp shyqtym. Men turǵan balkon qulaǵan joq, al 8, 7, 6-ynshy qabattardyń balkony opyrylyp qulady»,- dedi besinshi qabattaǵy páter iesi Janar Asanov.
