بٷگٸن اقتٶبەدە قۇيىندى داۋىل قۇرىلىس كراندارىن قۇلاتىپ, سالدارىنان ٷش پەتەردٸڭ بالكوندارى قيرادى. قازٸرگٸ ۋاقىتتا قۇرىلىس كومپانيياسى شىعىندى ەسەپتەپ, قۇلاعان كراندى بٶلشەكتەپ جاتىر, دەپ حابارلايدى «قازاقپارات» تٸلشٸسٸ.
اقتٶبەدەگٸ داۋىل باسى-اياعى 5 مينۋتقا سوزىلعانىمەن باتىس-2 اۋدانىنداعى تۇرعىن ٷيدٸڭ بٸرنەشە پەتەرٸنٸڭ بالكونىن قيراتىپ كەتتٸ. تابيعاتتىڭ توسىن مٸنەزٸنەن زارداپ شەككەندەردٸڭ بٸرٸ - توعىز قاباتتى ٷيدٸڭ سەگٸزٸنشٸ قاباتىندا تۇراتىن امانگەلدٸ جولدىباەۆ. پەتەر يەلەرٸ ٷرەيلەرٸن ەلٸ باسا الماي وتىر, پەتەرگە تٷسكٸ 12:30-دان كەيٸن ەشكٸم كٸرمەگەن.
«ٷيدە ەكٸ بالا بولدى. ەكەۋٸ دە مەكتەپ وقۋشىسى. ولار داۋىل كەزٸندە تەرەزەلەردٸ جاۋىپ, بٶلمە ٸشٸندە وتىرعان. ٶتە قورقىنىشتى. بۇل جەردە قۇرىلىس ەرەجەلەرٸ ساقتالماعان. كران ەسكٸ, تەمٸرٸ شٸرٸپ تۇر. نەگٸزٸنەن كران جەرگە مىقتى بەكٸتٸلۋٸ كەرەك. بۇعان دەيٸن دە كران جەل سوققان سايىن شايقالىپ, قاۋٸپ تٶندٸرٸپ تۇردى. بٷگٸنگٸ قاتتى داۋىلعا شىداس بەرمەدٸ. كراننىڭ نەشە مەتر ەكەنٸن بٸلمەيٸز. قۇرىلىس كومپانيياسىنان پاسپورتىن سۇراپ قويدىم. ولاردىڭ ەشقايسىسى شىقپاي قالدى. قازٸر تەك جۇمىسشىلارى كراندى دەنەكەرلەپ جاتىر»,- دەدٸ امانگەلدٸ جولدىباەۆ.
بۇل وتباسى ٷش بٶلمەلٸ پەتەردٸ نەسيەگە رەسٸمدەگەن. اي سايىن 100 مىڭ تەڭگە كٶلەمٸندە يپوتەكا تٶلەيدٸ.
«مەن ونداعان جىل بويى كران ايداعان اداممىن. كران شٸرٸپ تۇرعان. سوندىقتان ارىز تٷسٸرٸپ, قازٸر ٶلشەم جۇمىستارىن جٷرگٸزٸپ جاتىرمىز. بەينەتاسپاعا تٷسٸرٸپ, سۋرەتتەردٸ ساقتاپ قويدىق. سوتقا شاعىمدانامىز. سەبەبٸ, كران قۇلاعان كەزدە 7 مەترلٸك بالكوننىڭ بەتونى قيراعان. ول قيراعان كەزدە ٷيدٸڭ قابىرعالارىندا جارىق پايدا بولدى», - دەدٸ تۇرعىن امانگەلدٸ جولدىباەۆ.
ال بٸرٸنشٸ قاباتتا تۇراتىن ەسييا جۇماشەۆا ٷش مينۋتتا ٷيٸنٸڭ تەرەزەسٸ قيراپ, اۋلا سىرتىندا تۇرعان كٶلٸگٸنە ارماتۋرا كٸرٸپ كەتكەنٸن ايتتى.
«قاتتى داۋىل تۇرعان كەزدە جوعارىداعى بالكون قۇلاپ, بەتوننىڭ بٸر بٶلٸگٸ تەرەزەنٸ سىندىرىپ كەتتٸ. ەكٸ سالقىنداتقىشىم ٸستەن شىقتى. كٶلٸگٸمٸزدٸ تەمٸر تەسٸپ كەتٸپ, ەينەگٸ شىتىنادى. قۇرىلىس كومپانيياسىنىڭ ادامدارى كەلٸپ, ەينەكتٸ ٶلشەپ كەتتٸ. بٸز شىعىندى تولىق ٶتەۋدٸ تالاپ ەتەمٸز», - دەيدٸ ول.
ايتا كەتەيٸك, داۋىل كەزٸندە قوبىلاندى باتىر اتىنداعى ورتالىق ستاديوننىڭ شاتىرى بٷلٸندٸ, 6 كٶلٸك زاقىمداندى.
«ٷيلەردٸڭ اۋلاسىندا تۇرعان 6 كٶلٸك زاقىمداندى. قوبىلاندى باتىر اتىنداعى ورتالىق ستاديون تريبۋناسىنىڭ شاتىرى ٸشٸنارا ۇشىپ كەتتٸ. اۋماعى - 34 شارشى مەتر. شاتىر ۇشىپ, ستاديون جانىنداعى ەينەكتەن جاسالعان جازعى دەمالىس ورنىن سىندىرىپ كەتتٸ. زارداپ شەككەندەر مەن اۋرۋحاناعا تٷسكەندەر جوق», - دەدٸ اقتٶبە وبلىستىق تجد باسپاسٶز قىزمەتكەرٸ دينارا اتراۋباەۆا.
بۇعان دەيٸن حابارلاعانىمىزداي, اقتٶبەدەگٸ قاتتى داۋىل كەزٸندە بٸرنەشە ٷيدٸڭ شاتىرى ۇشىپ, 9 قاباتتى ٷيدٸڭ بالكوندارى قيراعان بولاتىن.
«پەتەرٸ زاقىمدانعان ادامدار بٸرٸگٸپ, زاڭگەر جالدادىق. ولار سوتتا بٸزدٸڭ قۇقىعىمىزدى قورعايدى. تٶتەنشە جاعدايلار قىزمەتٸ كەلٸپ, تەكسەرٸپ كەتتٸ. بالكونعا شىعۋعا تىيىم سالدى. مەن داۋىل كەزٸندە بالكوندا جٷرٸپ, كيٸم ٸلٸپ جاتتىم. سول كەزدە قاتتى جەل سوعىپ, قورىققانىمنان بٸر ورىندا تۇرىپ, باسىمدى ۇستاپ, ايقايلادىم. كەيٸن ەسٸمدٸ جيىپ, بالالاردى سىرتقا الىپ شىقتىم. مەن تۇرعان بالكون قۇلاعان جوق, ال 8, 7, 6-ىنشى قاباتتاردىڭ بالكونى وپىرىلىپ قۇلادى»,- دەدٸ بەسٸنشٸ قاباتتاعى پەتەر يەسٸ جانار اسانوۆ.
