QR Úkimeti terroristik áreket úshin azamattyqtan aiyrý jónindegi túzetýlerdi maquldady. Alaida QR Aqparat jáne komýnikatsiialar ministri Dáýren Abaevtyń pikirinshe, bul másele boiynsha túbegeili bailam jasaýǵa áli erte, dep habarlaidy QazAqparat Ortalyq kommýnikatsiialar qyzmetine silteme jasap.
«Bul másele ázirge belsendi talqylaný ústinde. Men zań qabyldanardan buryn barlyq pikirler eskeriledi degen oidamyn. Bul jerde mańyzdy bir másele bar. Terroristik áreketterdiń aýmaǵy álem boiynsha keńeie túsýde jáne ol túrli jaǵdailarda júzege asyrylýda. Terrorizmmen kúrestiń naqty tiimdi ádisi áli tabylǵan joq. Álem elderiniń barlyǵy qal-qaderlerinshe ony izdestirýde. Shveitsariiada terroristerdi azamattyqtan aiyrý jónindegi másele birneshe márte kóterildi. Sondai-aq atalmysh taqyryp álemniń kóptegen elderinde talqylanýda»,-dedi ministr «Habar» telearnasyndaǵy «Ashyq dialog» atty joba aiasynda.
Dáýren Abaevtyń sózinshe, zań jobasynyń bul normasy shet memleketterde soǵysyp júrgen azamattarǵa baǵyttalǵan.
«Biz áskeri qimyldarǵa úirengen adamdardyń elimizge kelip, qaýip tóndirýin qalamaimyz. Bul másele boiynsha naqty sheshim qabyldanǵan joq, taqyryp talqylanýda. Budan da jan-jaqty usynys, pikirlerdi biz Parlament qabyrǵasynda tyńdaimyz»,-dedi Abaev.
