QR Aqparat jáne qoǵamdyq damý ministri Dáýren Abaev sheteldik prodiýserler men telearna ókilderine birlese serial túsirýdi usyndy, dep habarlaidy QazAqparat.
«Men Reseiden, Qytaidan, Polsha men Úndistannan kelgen áriptesterime resmi túrde aitarym – biz birlesken joba jasaýǵa daiynbyz. Arnaiy qarajat bólip, jeke ári sapaly ónim daiyndaýǵa ázirmiz. Ol ónimdi Qazaqstanda da, shetelde de túsinikti bolatyndai shyǵarýǵa bolady. Eger sizderdiń taraptaryńyzdan qandai da bir usynys bolsa – marhabat. Biraq, eger biz seriktese jumys istesek, ol eldiń telearnasymen bizdiń eldiń telearnasy birlese jumys júrgizgen jón bolar edi. 2020 jyly birlesken joba ázirleiik. Biz kelesi jyldyń aiaǵynda 2 million dollardan artyq qarajat tapty dep maqtana aityp otyratyndai (kúldi) sol birlesken ónimdi shyǵaraiyq», - dedi Dáýren Abaev elordada ótip jatqan Astana Media Week sharasynda.
Aita keterligi, búgingi sharaǵa Polsha, Úndistan, Resei men Qytai elderinen prodiýserler men rejisserler kelgen bolatyn.
Eske sala ketsek, elordadaǵy «Qazmedia» ortalyǵynda úsh kúnge sozylatyn Ortalyq Aziiadaǵy eń iri media-oqiǵa — Astana Media Week ótip jatyr. Astana Media Week-tiń birinshi kúni serialdyq ónimderdi ázirleý jáne shyǵarý taqyrybymen jáne salyq preferentsiialary, kino prokatynyń sharttary, mazmuny, film óniminiń shyǵarmashylyq deńgeii jáne onyń demeýshiler úshin tartymdylyǵy taqyrybymen erekshelenedi.
