Aqparat jáne qoǵamdyq damý ministri Dáýren Abaev Qazaqstan Prezidenti Qasym-Jomart Toqaevtyń Reseige jasaǵan resmi saparynda qandai kelisimderge qol jetkizilgenin málim etti, dep habarlaidy QazAqparat tilshisi.
«Qasym-Jomart Kemelulynyń Qazaqstan Prezidenti retinde Reseige sapary óte sátti boldy. Memleket basshylarynyń shaǵyn jáne keńeitilgen quramda kezdesýi óte senimdi ári tatý sipatta ótti. Prezidentter saýdadan bastap mádeni-gýmanitarlyq salaǵa deiingi máselelerdiń keń aýqymyn talqylady. Taraptar ekijaqty qarym-qatynastyń buryn belgilengen qaǵidattarynan ainymaitynyn bildirdi», - dedi Dáýren Abaev «Habar» arnasyndaǵy «Ashyq dialog» baǵdarlamasynda.
Ministr óz sózinde taraptardyń kezdesýi barysynda birqatar mańyzdy qujattarǵa qol qoiylǵanyn atap ótti.
«Ásirese, óndiristik kooperatsiia salasynda birlese qolǵa alynatyn áreketterdiń baǵdarlamasyn erekshe atap óter edim. Ol Qazaqstanda keńirek kólik quraýǵa jáne traktorlar men avtobýstardyń, avtokólikterdiń shyǵarylymyn arttyrýǵa baǵyttalǵan», - deidi ministr.
Aqparat jáne qoǵamdyq damý ministri sonymen birge «Qazaqstan Prezidentin Máskeýdegi áýejaidan laiyqty dárejede kútip almady» degen áleýmettik jelidegi áńgimege qatysty oiyn aitty.
«Bul jaǵdaida keń talqylaýdyń eshqandai qajeti joq. Shýdyń bári keibir BAQ-tyń habarlamasynda jýrnalister Prezidentti kútip alǵandardyń ishinde RF Syrtqy ister vitse-ministri Aleksandr Pankinniń baryn umytyp ketkennen keiin bastaldy. Bul rette men bir mańyzdy niýansty túsindire ketkim keledi: Diplomatiiada saparlar deńgeii jaǵynan memlekettik, resmi jáne jumys, beiresmi dep bólinedi. Onyń árbirinde ózindik hattamalyq erekshelik bar. Odan taiqýǵa bolmaidy. Keshe resmi sapar boldy. Onyń barysynda ádette áýejaidan elshilerdiń nemese hattamalyq qyzmet basshylarynyń deńgeiinde kútip alady. Dál biz de solai isteimiz. Buǵan qosa reseilik tarap Syrtqy ister ministriniń orynbasaryn jiberip otyr. Bul degenińiz qonaqqa degen úlken qurmetti bildiredi», - deidi ministr.
Dáýren Abaev óz sózinde Memleket jáne Úkimet basshylary ózge eldiń Prezidentterin tek memlekettik sapar barysynda ǵana kútip alatynyn eskertti.
