Aqparat jáne qoǵamdyq damý ministri Dáýren Abaev BUU arnaiy baiandamashysy Kleman Nialetsossi Výldiń beibit jinalystar týraly zań jobasyna jasaǵan eskertpesine qatysty pikir bildirdi, dep habarlaidy QazAqparat.
«Baiandamamen tanystym. Keńestiń birqatary Parlament Senatynyń qabyrǵasynda esepke alynatynyna senimdimin. Sózsiz, arnaiy baiandamanyń árbir bóligi boiynsha jaýap beremiz. Túsindirý jumysyn júrgizemiz. Máselen, Výl myrza maska kiiýge (miting kezinde) qoiylǵan tyiymǵa qarsy shyǵyp jatyr. Alaida keibir pozitsiia boiynsha sóz talastyrýǵa da bolady. BUU arnaiy baiandamashysynyń máselen, AQSh-qa qarsy osyndai syn aitty ma, aitpady ma bilmeimin. Ol eldegi 15 shtatta da dál osyndai tyiym bar. Aýstriiada mundai erejeni buzǵany úshin 6 aiǵa deiin qamaidy. Ispaniiada betin jaýyp, jiynǵa shyqqandarǵa 30 myń eýro aiyppul salynady. Mundai tyiym Germaniia, Shvetsiia, Daniia men Shveitsariianyń keibir kantonynda da bar», - dedi Dáýren Abaev «Ashyq dialog» baǵdarlamasynda.
Ministr pandemiiany esepke ala otyryp, ártúrli jaǵdaidy eskerý kerektigin, alaida halyqaralyq tájiribeni de esten shyǵarmaý qajettigin atap ótti.
«Jasóspirimder mitingi uiymdastyra almaityny týraly eskertý jasaldy. Greta Týnberg mektepten qalýǵa azamattyq sipat negiz bola alatynyn búkil álemdik qaýymdastyqqa dáleldegenin, árine, túsinemin. Alaida, biz bul rette, alyp bara jatqan problemany kórip turǵan joqpyz. Biz jasóspirimderge mitingige qatysýǵa ruqsat beremiz. Sebebi biz qajetti konfentsiialardyń bárine qol qoiyp, sonyń aiasynda osyndai quqyq berýimiz kerek. Sonymen qatar memleket olardyń qaýipsizdigin de óz moinyna alady», - dedi ministr.
Dáýren Abaev bul rette memlekettiń dástúri de esepke alynýy tiis ekenin jetkizdi.
«Jalpy biz bul pikirge úlken qyzyǵýshylyqpen qaraimyz. Qashan da qaraýǵa, talqylaýǵa daiynbyz. Zań jobasynyń halyqaralyq qaýymdastyqtyń jiti nazaryna ilinip otyrǵany jaqsy», - dedi vedomstvo basshysy.
Aita ketsek BUU arnaiy baiandamashysy Kleman Nialetsossi Výl Qazaqstannyń beibit jinalystar týraly zań jobasyna qatysty syni pikir bildirip, onyń kei bóligine kelispeitinin málim etken edi.
