QR Aqparat jáne kommýnikatsiialar ministri Dáýren Abaev óz basqaratyn vedomstvonyń ótken jyly atqarǵan negizgi jumystaryna toqtaldy, dep habarlaidy QazAqparat.
«Halqymyzda «Eski jyl esirke, jańa jyl jarylqa» degen ataly sóz bar. Ras, 2018 túrli oqiǵalar men jańalyqqa toly jyl boldy. Biraz sharýa atqaryldy, irgeli ister igerildi. Aqparat jáne kommýnikatsiialar ministrliginiń bir jyldaǵy negizgi jetistikterine toqtala ketýdi jón sanap otyrmyn. Eń aldymen, «Tsifrlyq Qazaqstan» memlekettik baǵdarlamasyn júzege asyrý boiynsha aýqymdy jumystar qolǵa alyndy. Byltyr «Astana hab» tehnologiialyq parki óz jumysyn bastady. Bul tehnoparktiń aiasynda bilýge qumar, úirenýge yntaly jastarymyzdyń tsifrlyq múmkindikterin damytý úshin jan-jaqty jaǵdailardyń barlyǵy qarastyrylǵan. Qazir Qazaqstannyń bes qalasynda smart siti tujyrymdasy iske qosylýda», - dedi Dáýren Abaev Feisbýktegi paraqshasynda jariia etken video materialynda.
Onyń atap ótýinshe, jyl boiy el turǵyndaryna kórsetiletin memlekettik qyzmetti yńǵaily qalypqa túsirýge baǵyttalǵan jumystar da bir sátte toqtaǵan joq. Byltyr aldymen Astanada sodan keiin Almaty men Shymkent shaharlarynda jáne Qostanai qalasynda tsifrlyq halyqqa qyzmet kórsetý ortalyqtary ashyldy.
Sondai-aq Qazaqstannyń 7 qalasynda migratsiialyq qyzmet kórsetý ortalyqtary iske qosylyp, shetel azamattaryna «bir tereze» qaǵidasy boiynsha qyzmet kórsetý júzege asty. 20 myń shaqyrymdy quraityn talshyqty-optikalyq jeli qurylysy bastaldy. Bul shalǵai aýyldardy mekendeitin el turǵyndaryn sapaly internetpen qamtamasyz etýge jol ashady.
«Qazaq televiziiasynyń 60 jyldyq mereitoiy atalyp ótilgen jyly, iaǵni byltyr aimaqtardy tsifrlyq habar taratýǵa kóshirip, anologty habar taratýdy birtindep toqtata bastadyq. Shekaralyq aimaqtarda memlekettik radio habaryn taratý júiesin damytý jumystary jalǵasyp jatyr. Ózderińiz jaqsy bilesizder, bul kóptegen jyldar boiy sheshimin tappai kele jatqan másele bolatyn. Elimizdiń jýrnalisterin yntalandyrý maqsatynda «Úrker», «Tumar» ulttyq syilyqtaryn tabystaý men media salany jandandyrý boiynsha uiymdastyrylǵan «Astana media ýik» sharasy da tabysty ótti. Otandyq telearnalar men prodakshn stýdiialar qazirdiń ózinde joǵary reitingke ie bolǵan 46 serial túsirdi. Biz sandy emes sapany arttyrýǵa kóp kóńil bóldik. Memlekettik tapsyryspen túsirilgen serialdardyń janrlary da san-alýan. Tarih, tanym, til, dástúr, sport taqyryptary da keńinen qamtylǵan», - dedi ministr.
Sonymen qatar ol ótken jyldyń qarasha aiynan bastap «Egemen Qazaqstan» gazeti latyn álipbiimen jazylǵan maqalalarǵa ár sanynyń bir betin arnai bastaǵandyǵyn atap ótedi.
«Bul ulttyq álipbiimizge degen betburystyń alǵashqy qadamdarynyń biri retinde tarihta qalatyndyǵy daýsyz. Tamasha-tv telearnasynyń ashylýy da ótken jyldyń Qazaq televiziiasyna bergen sarqyty. Sonymen qatar «Qazaqstanyń 100 jańa esimi» jobasynyń ekinshi kezeńi ótkizildi. Osy aida qorytyndysy belgili bolady. Al 2018 jyly Qazaqstan halyqaralyq balalar Eýrovideniesi baiqaýyna alǵash ret qatysty. Bul bizdiń Eýropalyq habar taratý odaǵymen birikken jumysymyzdyń oń nátijesi. Ashyq úkimet portalynyń da jumysy ońtailandyryldy. Zań jobalaryn jetildirý jumystary da jalǵasyp jatyr. Bul 2018 jyly atqarylǵan jmuystardyń bir bóligi ǵana. Bir adamnyń ǵana emes, siz ben bizdiń bir judyryqtai jumylyp atqarǵan aýqymdy jumystardyń kórinisi. «Jumyla kótergen júk jeńil bolady» deidi. Sondyqtan alda bizdi áli de kóptegen irgeli ister kútip tur. Demek, ótken jylǵa ókpe joq, keler jyldan úmit kóp», - dep túiindeidi sózin Dáýren Abaev.
