Foto: Olympic.kz
Májilis depýtaty Dáýlet Turlyhanov óziniń áleýmettik jelidegi paraqshasynda áskeri gornizonnan qashqan ulyna qatysty pikir bildirdi, - dep habarlady "Ult aqparat".
"Sońǵy 5 aida áleýmettik jelilerde ulyma qatysty jaǵdaiǵa bailanysty óte kóp aqparat shyǵyp jatyr. Iá, bul jaǵdaidyń bolǵany ras, alaida ony qoǵamdyq ortaǵa qaita-qaita sala berýdiń jóni joq dep esepteimin. Jaǵdai oryn alǵanda, men óz pikirimdi ashyq aitqanmyn. Barlyq jaǵdai zań júzinde sheshilýi kerek degenmin.
Qazirgi kezde qoǵamdyq ortada meniń ulymnyń bir qateliginen basqa, qanshama aitylatyn ózekti máseleler bar emes pe?! Osy oraida, ulyma bailanysty jaǵdaidyń qoǵamda úlken aqparatqa ainalǵany túsiniksiz. Jaraidy, aqparattar shyǵyp jatyr, osy arqyly haip jinap, qoǵamda reitingin ósiremin degender óz maqsatyna jetken shyǵar. Endi meniń oiymsha bul máseleni osy jerden doǵarǵanymyz durys", - deidi sport ardageri.
Turlyhanovtyń aitýynsha, barlyq aqparat onyń ulyna úlken psihologiialyq aýyrtpalyq túsirip júr.
"Ol áli jap-jas jigit. Onyń jasaǵany - dizertirlik emes, bylaisha aitqanda, balalyqqa salynyp «samovolkaǵa» shyǵyp ketkeni. Men ulymnyń Qazaqstan Qarýly kúshteriniń sapynda jaýynger bolyp júrgenin maqtan etemin. Ol jastyqtyń jalynymen qatelik jasaǵany túsinikti. Ǵashyq bolyp júrgen bala, súigen qyzy kelgen eken, soǵan shyǵyp ketken. Bul endi jastyq sezim, mahabbat sezimi. Árine, men ony aqtamaimyn. Qai ata-ana óziniń balasyn jaman bolsyn deidi?!
Osy jaǵdaiǵa bailanysty aqparattardan habardar bolyp otyrǵan balamnyń qazirgi psihologiialyq jaǵdaiy meni qatty alańdatady. Qudai saqtasyn, osy jaǵdai balamnyń taǵdyryn tálkekke salyp, qandai da bir oqys áreketke barýyna sebep bolsa, men de óz tarapymnan qarap qalmaimyn, qoldanystaǵy zań sheńberinde áreket etemin, - deidi ol.
Depýtat bul máselege qatysty túsinistikpen qaraýdy surady.
"Men - ómirimniń basym bóligin úlken sportqa arnaǵan adammyn. On jyl SSSR quramasynda kúrestim, Táýelsiz Qazaqstannyń týyn tuńǵysh ret Olimpiada oiyndarynda kóterip shyqtym. Ózim sportty qoiǵannan keiin, bapker retinde Aziia, Aziia oiyndary, Álem jáne Olimpiada chempiondaryn tárbielep shyǵardym. Men qazaqtyń uly bolǵanyma maqtanamyn! Qazaq úshin tógilgen qara terim men ólsheýsiz eńbegimdi halqym baǵalaǵan, áli de baǵalap, qurmettep keledi.
Búgingi kúndegi abyroiym orasan eńbektiń arqasynda kelgen. Al meniń ulymmen bolǵan bir ǵana jaǵdai halyq aldyndaǵy abyroiymdy túsire almaidy. Qoǵamdy dúrliktirip, aqparat taratyp júrgender osyny túsinse eken deimin.
Qurmetti dostar! Taǵy da qaitalap aitqym keledi, ulyma qatysty tergeý amaldary júrgizilip jatyr. Bári zań sheńberinde sheshiletin bolady. Túsinistikpen qaraýlaryńyzdy suraimyn, - dep jazdy Dáýlet Turlyhanov.
