Parlament Májilisinde ótken jiynda depýtat Dáýlet Muqaev «tipti eden jýýshy bolyp jumysqa turǵyzý úshin para suraidy» degen máseleni kóterdi, dep habarlaidy "Ult aqparat".
8 aqpanda májilis kýlýarynda áleýmettik saladaǵy sybailas jemqorlyqqa qarsy is-qimyl máseleleri talqylandy. Onda sóz sóilegen depýtat D. Muqaev jemqorlyq elde qanshalyqty qanat jaiǵanyna mysal keltirdi.
«Ásirese Qyzylordadan, Shymkentten maǵan kóp hat jazady. Jai ǵana eden jýýshy bolyp jumysqa ornalasý úshin 500 myń teńge suraidy. Muǵalimderdiń stavkasy million, million jarym bolyp ketken mysalǵa. Mundai hattar óte kóp. Osyndai hattar kelgen kezde antikorǵa habarlasyńyz deimin. 1424 degen nomerin de beremin. Endi sol 1424 degen nomerdegi algoritm qalai júredi? Men dálelińiz bar ma dep suraimyn, bar deidi. Aýdio, videosy da bar shyǵar. Kóp adam «erteń meniń basyma bále bolady» dep qoryqady. Odan keiin qazir jemqorlyq týraly habar bergenderge de syiaqy beredi ǵoi. Onyń da júzege asý algoritmy qandai? Aqyry sizder jemqorlyqpen kúrese almasańyzdar biz bolyp, halyq bolyp, belsendiler bolyp ózimiz kúreseiik», -dedi Dáýlet Muqaev Sybailas jemqorlyqqa qarsy is-qimyl agenttigi ókilinen.
Suraqqa jaýap bergen QR Sybailas jemqorlyqqa qarsy is-qimyl agenttigi Preventsiia qyzmetiniń basshysy Saian Ahmetjanov anonimdi faktilerdi de taldaýǵa alatynyn aitty.
«Ol azamattyń arnaiy aryzy bolýy kerek. Ony taldaý emes, qylmystyq istiń jedel jumystary atqarady. Eger qylmystyq is anyqtalsa, ol is tirkelip, ústinen is qozǵalady. Eger anonimdi fakti bolsa, taldaýǵa alamyz. Qylmystyq is qozǵalýy úshin shaǵymdanýshynyń arnaiy aryzy bolýy kerek», - dedi Saian Ahmetjanov.
