پارلامەنت مەجٸلٸسٸندە ٶتكەن جيىندا دەپۋتات دەۋلەت مۇقاەۆ «تٸپتٸ ەدەن جۋۋشى بولىپ جۇمىسقا تۇرعىزۋ ٷشٸن پارا سۇرايدى» دەگەن مەسەلەنٸ كٶتەردٸ, دەپ حابارلايدى "ۇلت اقپارات".
8 اقپاندا مەجٸلٸس كۋلۋارىندا ەلەۋمەتتٸك سالاداعى سىبايلاس جەمقورلىققا قارسى ٸس-قيمىل مەسەلەلەرٸ تالقىلاندى. وندا سٶز سٶيلەگەن دەپۋتات د. مۇقاەۆ جەمقورلىق ەلدە قانشالىقتى قانات جايعانىنا مىسال كەلتٸردٸ.
«ەسٸرەسە قىزىلوردادان, شىمكەنتتەن ماعان كٶپ حات جازادى. جاي عانا ەدەن جۋۋشى بولىپ جۇمىسقا ورنالاسۋ ٷشٸن 500 مىڭ تەڭگە سۇرايدى. مۇعالٸمدەردٸڭ ستاۆكاسى ميلليون, ميلليون جارىم بولىپ كەتكەن مىسالعا. مۇنداي حاتتار ٶتە كٶپ. وسىنداي حاتتار كەلگەن كەزدە انتيكورعا حابارلاسىڭىز دەيمٸن. 1424 دەگەن نومەرٸن دە بەرەمٸن. ەندٸ سول 1424 دەگەن نومەردەگٸ الگوريتم قالاي جٷرەدٸ? مەن دەلەلٸڭٸز بار ما دەپ سۇرايمىن, بار دەيدٸ. اۋديو, ۆيدەوسى دا بار شىعار. كٶپ ادام «ەرتەڭ مەنٸڭ باسىما بەلە بولادى» دەپ قورىقادى. ودان كەيٸن قازٸر جەمقورلىق تۋرالى حابار بەرگەندەرگە دە سىياقى بەرەدٸ عوي. ونىڭ دا جٷزەگە اسۋ الگوريتمى قانداي? اقىرى سٸزدەر جەمقورلىقپەن كٷرەسە الماساڭىزدار بٸز بولىپ, حالىق بولىپ, بەلسەندٸلەر بولىپ ٶزٸمٸز كٷرەسەيٸك», -دەدٸ دەۋلەت مۇقاەۆ سىبايلاس جەمقورلىققا قارسى ٸس-قيمىل اگەنتتٸگٸ ٶكٸلٸنەن.
سۇراققا جاۋاپ بەرگەن قر سىبايلاس جەمقورلىققا قارسى ٸس-قيمىل اگەنتتٸگٸ پرەۆەنتسييا قىزمەتٸنٸڭ باسشىسى سايان احمەتجانوۆ انونيمدٸ فاكتٸلەردٸ دە تالداۋعا الاتىنىن ايتتى.
«ول ازاماتتىڭ ارنايى ارىزى بولۋى كەرەك. ونى تالداۋ ەمەس, قىلمىستىق ٸستٸڭ جەدەل جۇمىستارى اتقارادى. ەگەر قىلمىستىق ٸس انىقتالسا, ول ٸس تٸركەلٸپ, ٷستٸنەن ٸس قوزعالادى. ەگەر انونيمدٸ فاكتٸ بولسا, تالداۋعا الامىز. قىلمىستىق ٸس قوزعالۋى ٷشٸن شاعىمدانۋشىنىڭ ارنايى ارىزى بولۋى كەرەك», - دەدٸ سايان احمەتجانوۆ.
