Foto: uiymdastyrýshylardan
Almatyda «Assyltas» qoǵamdyq qorynyń jyl qorytyndy keshinde «Assyltas» stipendiiasynyń iegerleri marapatttaldy. Qoǵamdyq mańyzy bar tórt nominatsiia boiynsha stipendiia jeńimpazdary «Assyltas» qoǵamdyq qorynyń saitynda ashyq halyqtyq daýys berý, sondai-aq ekinshi týrda qazylar alqasy músheleriniń daýys berý qorytyndysy boiynsha anyqtaldy, dep habarlaidy Ult.kz.
Esterińizde bolsa, buǵan deiin áleýmettik jelilerde «qatysýshylardy qaiyrshy qyldy», «daýys surap, jalynǵandar kóbeidi», «qazylar anyqtasa, daýys nege jinaidy» degen siiaqty pikirler týyndap, jeli qoldanýshylary ózara daýlasqan bolatyn. Ult.kz tilshisi qordyń quryltaishysy Dýlat Tastekeige qoǵamda qyzý talqyǵa túsken máselege qatysty pikirin surap bildi.
«Bul birinshi jyl emes, birneshe jyldan beri tórt atalym boiynsha berilip kele jatqan stipendiia. Biz laiyqty úmitkerdi tańdap alýǵa tyrysamyz. Men óz basym tikelei daýys jinaýǵa jáne daýys berýge qatyspaimyn. Basynan bastap solai kelisilgen. Birinshi halyq daýys beredi. Halyq tańdaǵan úmitkerlerdiń ishindegi úsh myqtyǵa sol salanyń beldi mamandary daýys beredi. Jyl boiy istegen jumystaryn eskere otyryp, kimniń kúshti ekenin anyqtaidy.
Endi jeńis bar jerde jeńilis te bar. Jeńilis bar jerde jeńis te bar. Endi qatty aitsaq, «jyǵylǵan kúreske toimaidy» degen túsinik bar. Barlyq adamǵa birdei júlde beremiz, stipendiia beremiz dep ýáde bergen joqpyz. Sondyqtan naqty stipendiiaǵa qoly jetpei qalǵan adamdardyń renishi shyǵar. Meniń ár salaǵa tikelei baǵa beretin quzirettiligim joq. Biraq bizdiń nietimiz bir, elimizdiń sol baǵyttaǵy ókili jyl boiyna qarjy jaǵynan taryqpasyn degen niet qana», – deidi Dýlat Tastekei.
Aita keteiik, stipendiianyń kólemi – 1 500 000 teńge. Bul baǵa aldaǵy ýaqytta óse me, kelesi jylǵy biýdjet qandai bolýy múmkin degen suraqqa qor quryltaishysy tosyn jaýap qatty.
«Biz stipendiiany bermei-aq qoisaq ta bolady. Mysaly, kelesi jyly osy stipendiiany toqtatyp tastaiyq, eger unamasa bermei-aq qoiaiyq. Biz ol daýysqa muqtaj emespiz, májbúr emespiz. Jalǵyz nietimiz jaqsylyq jasaý. Sol salanyń bir ókiline kómektesý, qolǵabys bolý. Tyrnaqtyń astynan kir izdegen adam tabady, dál mundai daý bolatyn bolsa, múldem toqtatyp tastaý josparda bar», – dedi «Assyltas» qoǵamdyq qorynyń quryltaishysy Dýlat Tastekei.
Sonymen biyl Ádebiet atalymy boiynsha «Assyltas» stipendiiasynyń iegeri 2024 jyly jaryq kórgen «Aǵyraptaǵy aty joq adam» kitabynyń avtory Qanat Ábilqaiyr boldy. Al Ǵylym atalymy boiynsha Nurhat Jaqiev alsa, Jýrnalistika atalymy boiynsha «Assyltas» stipendiiasynyń iegeri «Egemen Qazaqstan» gazetiniń jýrnalisi Marjan Ábish boldy. Al Sport atalymy boiynsha «Assyltas» stipendiiasyna Abiba Ábýjaqynova laiyq dep tanyldy.
