QR Bilim jáne ǵylym ministrligi dástúrli formatta oqityn stýdentterden PTR test talap etilmeitinin eskertti, dep habarlaidy QazAqparat.
«Karantin talaptaryna sáikes oqý orny ǵimaratynda, kitaphana jáne jataqhananyń kire berisinde Ashyq qosymshasynyń bolýy jáne ony qoldaný mindetti. Tynys alý joldarynyń infektsiiasynyń belgileri bar (jótel, murynnan sý aǵý, dene temperatýrasy 37-den joǵary) adamdardy oqý ǵimaratyna kirgizýge bolmaidy. Sonymen qatar maska rejimi saqtalady. Jáne stýdentterden PTR testin talap etýge jol berilmeidi», - dedi QR Bilim jáne ǵylym ministrligi joǵary jáne joǵary oqý ornynan keiingi bilim departamentiniń direktory Ádilet Toibaev OKQ-de ótken brifingte.
Onyń aitýynsha, búginde elimizde 5 myńnan astam stýdent jataqhanada turady.
«Joǵary oqý oryndary basqa qaladan keletin stýdentterdi jataqhanaǵa ornalastyrýdy aldyn ala qamtamasyz etedi. Sondai-aq, koronavirýstyq infektsiiaǵa qarsy ujymdyq immýnitetti qalyptastyrý maqsatynda ýniversitetter professor-oqytýshylar quramy men qyzmetkerlerdi, stýdentterdi tolyq vaktsinatsiialaýǵa tartý boiynsha aqparattyq-túsindirý jumysyn jalǵastyryp jatyr. Búgingi tańda joǵary oqý oryndary stýdentteri arasynda 18 jasqa tolmaǵan jáne meditsinalyq anyqtamasy barlardy esepke alǵanda 81,3%-y, professorlyq-oqytýshylar quramy arasynda 94,6% (14 qańtar) ekpe aldy», - deidi ol.
Sondai-aq departament direktory karantin talaptaryn saqtai otyryp, oqý kestesiniń buzylmaýyna erekshe mán beriletinin aitty.
